वरवंड, ता. २८ : वरवंड (ता. दौंड) येथील एका धार्मिकस्थळातील मूर्तीची अज्ञात व्यक्तीने तोडफोड केल्याचा धक्कादायक प्रकार रविवारी (ता. २७) सकाळी उघडकीस आला.
या घटनेचे गांभीर्य लक्षात घेवुन उपविभागीय पोलिस अधिकारी बापूराव दडस, गुन्हे अन्वेषण विभागाचे पोलिस निरीक्षक अविनाश शिळीमकर, पोलिस उपनिरीक्षक सलीम शेख आदी पोलिस अधिकाऱ्यांनी श्वान पथकासह घटनास्थळी धाव घेतली व परिसराची सखोल पाहणी व तपासणी केली.
दरम्यान, या प्रकाराबाबत नागरिकांनी तीव्र शब्दात संताप व्यक्त केला. दिवसभर गावात तणावपूर्ण शांतता होती. सायंकाळी
उशिरापर्यंत पोलिस अधिकाऱ्यांसह पोलिस पथके परिसरात ठाण मांडून होती. पोलिस पाटील किशोर दिवेकर यांनी दिलेल्या फिर्यादीच्या अनुषंगाने यवत पोलिस ठाण्यात अज्ञात व्यक्तीच्या विरोधात गुन्हा दाखल केला. रात्री उशिरापर्यंत यवत पोलिस ठाण्यात पुणे ग्रामीण पोलिस अधिक्षक संदीपसिंह गिल, अतिरिक्त पोलिस अधिक्षक गणेश बिराजदार हे ठाण मांडून घटनेची माहिती घेत होते.