वडगाव निंबाळकर, ता. ११ ः होळ-सदोबाचीवाडी (ता. बारामती) येथील अजित विविध कार्यकारी सेवा सहकारी सोसायटीच्या वार्षिक सर्वसाधारण सभेमध्ये सभासदांसाठी १५ टक्के लाभांश जाहीर केला गेला. सोसायटीला ‘ब’ वर्ग दर्जा मिळाला असून तिची बँक पातळीवर शंभर टक्के वसुली आहे. संस्थेने या वर्षीदेखील लाभांश देण्याची परंपरा कायम राखल्यामुळे सभासदांनी समाधान व्यक्त करीत कामकाजाविषयी माहिती जाणून घेतली. सोसायटी सचिव किरण तावरे यांनी अहवाल वाचन केले. याच ठिकाणी प्रतिभा ग्रामीण बिगर शेती सहकारी पतसंस्थेची वार्षिक सभा पार पडली. संस्थेने या वर्षी ११ टक्के लाभांश जाहीर केला आहे. यावेळी उपस्थित सभासदांनी संस्थेचे होणारे कर्ज वाटप, एकूण ठेवींची संख्या याबाबतची माहिती जाणून घेतला. यावेळी सचिव सदाशिव सूर्यवंशी यांनी अहवाल वाचन केले.
दोन्ही संस्थांच्या वार्षिक सभेच्या अध्यक्षस्थानी बारामती तालुका दूध संघाचे माजी अध्यक्ष बापूराव सूर्यवंशी होते. यावेळी सोमेश्वर कारखान्याचे माजी संचालक विनायकराव पिसाळ, अजित सोसायटीचे अध्यक्ष दादासो सूर्यवंशी, विठ्ठलराव पिसाळ, भालचंद्र भोसले, अंकुश जगताप, बबन सूर्यवंशी उपस्थित होते. ‘‘संस्था वाढीसाठी सभासदांचे पाठबळ महत्त्वाचे ठरते. यापुढेही सभासद संस्थेचे हित लक्षात ठेवून सहकार्य करतील,’’ अशी अपेक्षा बापूराव सूर्यवंशी यांनी या वेळी व्यक्त केली.