वेल्हे, ता. २१ ः रायगड जिल्ह्याच्या हद्दीवर व गुंजवणी पाणलोट क्षेत्राच्या बॅकवॉटर परिसरामध्ये गेल्या काही दिवसांपासून जोरदार पडत असलेल्या पावसामुळे गुंजवणी धरण शनिवारी (ता. २०) १०० टक्के भरल्याची माहिती गुंजवणी धरण विभागाचे उपअभियंता नयन गिरमे यांनी दिली. धरणात क्षमतेइतका ३.६९ टीएमसी पाणीसाठा झाला असून, धरणाच्या वीज निर्मिती केंद्राच्या सांडव्यातून २५० क्युसेकने पाणी सोडले जात आहे. गेल्या चार ते पाच दिवसांपासून धरण क्षेत्रामध्ये मोठ्या प्रमाणात पाऊस पडला. मात्र शनिवारपासून धरण माथ्यावरील पावसाचा जोर कमी झाला असला तरी निवी, कानंद, घेवंडे भट्टीसह घिसर परिसरातील ओढे- नाले दुथडी भरून वाहत आहेत. यामुळे धरणात पाण्याची मोठ्या प्रमाणात आवक सुरू आहे. रविवारी (ता. २१) धरण क्षेत्रामध्ये पावसाचा जोर ओसरला आहे.