वालचंदनगर, ता. ९ : भवानीनगर (ता. इंदापूर) येथील श्री छत्रपती सहकारी साखर कारखान्याशी तोडणी-वाहतुकीचा करार करून दुसऱ्या कारखान्याला ऊस वाहतूक करणाऱ्या वाहनांवर श्री छत्रपती कारखान्याने कारवाई करण्यास सुरु केली आहे.
राज्यातील साखर कारखान्यांच्या गळीत हंगामास १ नोव्हेंबरपासून सुरवात झाली आहे. इंदापूर, बारामती तालुक्यातील बहुतांश साखर कारखानेही सुरु झाले आहेत. कारखान्यांनी दोन महिन्यांपूर्वीच ऊस तोडणी वाहतुकीचे करार करून अॅडव्हान्स रक्कम ट्रॅक्टर मालकांच्या माध्यमातून ऊस तोडणी कामगारांना दिली आहे. मात्र, काही वाहनाचालक अॅडव्हान्स रक्कम घेऊन दुसऱ्या कारखान्यांच्या कार्यक्षेत्रामध्ये ऊस तोडणी करून वाहतूक करीत आहेत. करार एका कारखान्याशी व ऊस तोडणी- वाहतूक दुसऱ्या कारखान्याशी, असे प्रकार सुरु आहेत. श्री छत्रपती कारखान्याच्या कारखान्याशी करार करून दुसऱ्या कारखान्याला ऊस वाहतूक करणाऱ्या ट्रॅक्टर चालकांवर कारखान्याने कारवाईचा बडगा उगारला असून, कारवाई करण्यास सुरवात केली आहे.
यासंदर्भात श्री छत्रपती कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांनी सांगितले की, आम्ही वाहनचालकांना अॅडव्हान्स दिला आहे. वाहनचालकांना ऊस तोडणीचे नियोजन दिले आहे. वाहनचालकांचे नुकसान होऊ नये, याची काळजी संचालक मंडळ घेत आहे. वाहनचालकांनी दुसऱ्या कारखान्यांना ऊस वाहतूक करू नये. नियमबाह्य काम करणाऱ्या वाहनांवर संचालक मंडळ कारवाई करणार आहे.