वाल्हे, ता. २३ : संत ज्ञानेश्‍वर महाराजांच्या पालखी सोहळ्याचा पुरंदर तालुक्यातील चौथा आणि पुणे जिल्ह्यातील शेवटचा मुक्काम वाल्हे येथे बुधवार (ता. २५)
होणार आहे. पालखी सोहळ्यातील वैष्णवांचे स्वागत करण्यासाठी जय्यत तयारीचे काम अंतिम टप्प्यात असून वाल्हे ग्रामपंचायतीने पंधरा एकराचे प्रशस्त पटांगण सज्ज केल्याचे सरपंच अतुल गायकवाड यांनी सांगितले.
मंगळवारी जेजुरी नगरीतून पालखी निघाली असून दौंडज खिंडीमध्ये न्याहरीसाठी काही वेळ पालखी सोहळा थांबणार आहे. दुपारी एकच्या सुमारास पालखी वाल्हेमध्ये दाखल होईल. गावाच्या वेशीवर ग्रामपंचायतीच्या वतीने स्वागत करण्यात येणार आहे.
पालखी सोहळ्यातील वैष्णवांसाठी जागोजागी अन्नदान, फराळ, चहा वाटप कार्यक्रमांसाठी मंडप उभारण्यात आले आहेत. वाल्हे नजीक सुकलवाडी फाट्यावरील
पालखी मुक्कामाची ग्रामपंचायतीकडून तयारी पूर्ण झाली असून सोहळ्यातील वैष्णवांसाठी पाणी, आरोग्य, विद्युतपुरवठा याबाबत विशेष काळजी घेण्यात आली
आहे. वाल्हे परिसरातील वाड्यावस्त्यांसह सुकलवाडी, कामठवाडी परिसरामध्ये पालखीसोहळा विसावला जातो. वाल्हे प्राथमिक आरोग्य केंद्रामार्फत गावठाणासह
परिसरातील सर्व विहिरी व पाण्याच्या टाक्या स्वच्छ करून त्यामध्ये टीसीएल टाकण्यात आले आहे. ग्रामपंचायतीमार्फत पालखीतळावर आणि गावठाणामध्ये आवश्यक ठिकणी मुरमीकरण, सपाटीकरण करून वाळू टाकून सुशोभीकरण करण्यात आले आहे. गावांतर्गत रस्ते स्वच्छता, धुरळणी, जंतूनाशक फवारणी करण्यात आली आहे. पालखीतळावर वीज व्यवस्थेसाठी मनोरे उभारण्यात आले आहेत. सुरक्षेच्या दृष्टीने जागोजागी सीसीटीव्ही बसविण्यात आले आहेत.
दरम्यान प्राथमिक आरोग्य केंद्रामार्फत गावांतील हॉटेल, दुकानदार यांना पदार्थ उघडे ठेऊ नये आणि पाणी स्वच्छ व शुद्ध ठेवण्यासंदर्भात सूचना करून त्यांची तपासणी करण्यात आल्याचे पर्यवेक्षिका संजीवनी दरे यांनी सांगितले. पालखीतळ परिसर आणि गावामध्ये आवश्यक ठिकाणी शौचालयाचे युनिट तसेच लाइट, पाण्याची सोय तसेच वारकऱ्यांचे टँकर भरण्यासाठी ठिकठिकाणी सुविधा उपलब्ध केल्याचे ग्रामसेवक जयेंद्र सुळ यांनी सांगितले.