वाल्हे, ता. १४ : पुरंदर तालुक्यातील वाल्हे येथील रयत शिक्षण संस्थेच्या महर्षी वाल्मीकी विद्यालयात गुरुवारी (ता. १४) शासनाच्या निर्देशानुसार सामुदायिक पसायदानाचे आयोजन केले होते. संतश्रेष्ठ ज्ञानेश्‍वर महाराजांच्या सप्तशतकोत्तर सुवर्ण महोत्सवी (७५०) जयंती वर्षानिमित्त हा उपक्रम
राबविण्यात आला.
महर्षी वाल्मीकी विद्यालयात कार्यक्रम घेण्यात आला. यावेळी प्रांगणामध्ये संतश्रेष्ठ ज्ञानेश्‍वर महाराजांची मोठी प्रतिमा तयार करून आकर्षक रांगोळी आणि फुलांच्या सहाय्याने सजावट केली होती. त्याभोवती टाळ-मृदंगासह, वीणा, पेटी आदींची मांडणी करण्यात आली. यावेळी विद्यालयाचे प्राचार्य सतीश निगडे यांच्या हस्ते प्रतिमा पूजन करण्यात आले. सरपंच अतुल गायकवाड, संदीप जाधव यांनी कार्यक्रमाचे संयोजन केले. यावेळी पुणे जिल्हा बँकेचे अध्यक्ष प्रा. दिगंबर दुर्गाडे म्हणाले, ‘‘माउलींच्या सप्तशतकोत्तर सुवर्णमहोत्सवी जयंतीनिमित्त विद्यार्थ्यांमध्ये आध्यात्मिक आणि सांस्कृतिक मूल्यांची जोपासना करणे, त्यांना ज्ञानेश्‍वरी आणि पसायदानातून चांगली मूल्यांची जाणीव जागवण्यासाठी घेतलेला हा उपक्रम उल्लेखनीय ठरला आहे.’’ सुकलवाडी येथील अशोक महाराज पवार यांनी पसायदान घेतले. यामध्ये इयत्ता पाचवी ते बारावी पर्यंतच्या विद्यार्थ्यांनी उस्फूर्त सहभाग नोंदविला. प्राचार्य सतीश निगडे यांनी प्रास्ताविक केले.