वाल्हे, ता.१६ : ''पंढरीनाथा साजिरी पालखी'',''ज्ञानोबा माऊली पुढे चालती''... अभंगाच्या ओव्या गुणगुणत संतश्रेष्ठ श्री ज्ञानेश्वर महाराज यांच्या सप्तशतकोत्तर सुवर्णमहोत्सवी जयंती वर्षानिमित्त वाल्हे(ता.पुरंदर) येथील आद्यरामायणकार वाल्मिकनगरीत ग्रामपंचायतीच्या वतीने गावांतर्गत पालखी सोहळ्याचे आयोजन करण्यात आले होते.
मुख्यमंत्री देवेंद्र फडणवीस यांच्या संकल्पनेतून आणि नगरविकास विभागाच्या परिपत्रकानुसार संपूर्ण महाराष्ट्रात संत ज्ञानेश्वर महाराज जयंती सुवर्णमहोत्सवाच्या निमित्ताने विशेष उपक्रम राबवले जात आहेत. याच पार्श्वभूमीवर वाल्हे ग्रामपंचायतीने पालखी सोहळा आयोजित केला होता. संत सावतामाळी मंदिरापासून पालखी सोहळ्याला सुरवात होऊन गावांतर्गत नगरप्रदक्षिणा करण्यात आली. ग्रामदैवत श्री भैरवनाथ मंदिरात या पालखीची सांगता झाली. नगरप्रदक्षिणेच्या प्रारंभी सरपंच अतुल गायकवाड यांच्या हस्ते पालखीतील संत श्री ज्ञानेश्वर महाराजांच्या प्रतिमेचे विधिवत पूजन करण्यात आले. टाळ, मृदंग, टाळ-चिपळ्यांच्या नादात संपूर्ण परिसरात भक्तिमय वातावरण निर्माण झाले होते. गावात भव्य आणि श्रद्धेने पार पडलेल्या या पालखी सोहळ्यात भगव्या पताका खांद्यावर घेऊन अभंग गात भाविक सहभागी झाले. महिला डोक्यावर तुळशी वृंदावन घेऊन भक्तिरसात न्हाल्या होत्या. शेवटी महिलांनी फुगड्यांच्या माध्यमातून आनंदोत्सव साजरा केला. या पालखी सोहळ्यात सरपंच अतुल गायकवाड, उपसरपंच सम्राज्ञी लंबाते, पूर्वा राऊत, सागर भुजबळ, अमित पवार, दादासाहेब मदने, अशोक महाराज पवार, सोमनाथ गायकवाड, संदीप दुर्गाडे, हरीश दुबळे, पांडुरंग पवार, मारुती पवार, सागर पवार, सुहास राऊत आदींसह ग्रामस्थ सहभागी झाले होते.