वाल्हे, ता. २० : पुरंदर तालुक्यातील आडाचीवाडी हे गाव सध्या मुख्यमंत्री समृद्ध पंचायतराज अभियानांतर्गत विविध उपक्रमामुळे प्रकाशझोतात आले आहे. तसेच ते गेल्या काही दिवसांपासून वन्य प्राण्यांच्या विशेषतः बिबट्याच्या संचारामुळे चर्चेत राहिले आहे. त्यात शुक्रवार (ता. १९) रात्री गावच्या स्वागत कमानी शेजारील पुलावर मुक्त संचार करणारे बिबट्याने फोडलेल्या जोरदार डरकाळीने आडाचीवाडीकरांच्या अंगावर शहारा आणणारी ठरली.
गेल्या पंधरा दिवसांत बिबट्याने आडाचीवाडी परिसरातील दोन ठिकाणी पाळीव कुत्रा व वासरावर हल्ला करत त्यांचा फडशा पाडला आहे. परिणामी, शेतकरी वर्ग अतिशय भयभीत झाला असून हातातोंडाशी आलेली पिके काढण्यासाठी देखील शेतात जायची भीती वाटू लागली आहे. अनेक शेतकरी व मजूर दिवसाही एकटे शेतात जाणं टाळू लागले आहेत. शुक्रवारी (ता. १९) रात्री उशिरा दूध संकलन करणाऱ्या वाहनावरील सचिन खवले यांना तर माजी तंटामुक्ती समितीचे माजी अध्यक्ष प्रशांत पवार यांना देखील बिबट्या थेट पुलावर संचार करताना दिसला. वाहनाच्या प्रकाशझोतात बिबट्याचे दर्शन होताच
त्यांनी इतर ग्रामस्थांना सावध केले. वनविभागाकडे तातडीच्या कारवाईची मागणी आडाचीवाडीत बिबट्याचा वावर वाढल्यामुळे ग्रामस्थ व शेतकऱ्यांमध्ये तीव्र भीतीचे वातावरण निर्माण झालं आहे. त्यामुळे वनविभागाने तातडीने उपाययोजना कराव्यात, पिंजरे लावावेत, गस्त वाढवावी आणि गावातील सुरक्षेची खात्री करावी, अशी जोरदार मागणी ग्रामस्थांनी केली आहे. दरम्यान, आडाचीवाडी परिसरामध्ये बिबट्याचा स्वैरसंचार वाढल्याने यामार्गाने रात्री वेळी दुचाकीचा प्रवास टाळण्याचे आवाहन सरपंच सुवर्णा बजरंग पवार यांनी केले आहे.