वाल्हे, ता. २१ : नीरा (ता. पुरंदर) येथील ग्रामदैवत श्री महालक्ष्मी मातेचा उत्सव सोमवार पासून सुरू होत आहे. अनेक वर्षांपासून लक्ष्मीमातेच्या नवरात्रोत्सवाची परंपरा अखंडपणे सुरू आहे. नवरात्रोत्सवानिमित्त मंदिराला फुलांच्या आकर्षक सजावटीसह विद्युत रोषणाई करण्यात आली आहे. या काळात मंदिरात महालक्ष्मी माता, हनुमान यात्रा मंडळ, नीरा-शिवतक्रार ग्रामस्थांच्या वतीने विविध धार्मिक कार्यक्रमांचे आयोजन केले आहे.
नीरा (ता. पुरंदर) येथील ग्रामदैवत लक्ष्मीमाता मंदिराचा जीर्णोदार केल्याने मंदिराचे रूप पालटले आहे. ग्रामस्थांनी लाखो रुपये लोकवर्गणी गोळा करुन लक्ष्मीमाता मंदिराचा जीर्णोद्धार केला असून मंदिरामुळे शहराच्या वैभवात भर पडली आहे.
घटस्थापनेदिवशी सकाळी लक्ष्मीमातेला महाभिषेक घालून मंदिरात घटस्थापना केली जाते. नवरात्रोत्सवानिमित्त नऊ दिवस विविध धार्मिक कार्यक्रमाचे आयोजन केले आहे. काकड आरती, भक्तिगीत गायन, भक्ती संध्या, ढोल लेझीम, भजन, व्याख्यान, आदिशक्ती महिला मंडळ जोगवा, दांडिया, होमहवन, देवीचा जागर आदि भरगच्च कार्यक्रम होतात. नवरात्रोत्सव म्हणजे नीरा शहरातील ग्रामस्थांसाठी चैतन्याचा एक सोहळाच असतो. नीरेसह परिसरातील महिला नऊ दिवस श्री लक्ष्मीमातेची आराधना करतात.
दसऱ्याच्या दिवशी सीमोल्लंघनासाठी श्री लक्ष्मीमातेच्या मुखवट्याची पालखीतून मिरवणूक काढण्यात येणार असून पालखी मिरवणुकीत पारंपरिक ढोल-ताशा आणि फटाक्यांची आतषबाजी होणार आहे.