वाल्हे, ता. ३ : नीरा (ता. पुरंदर) येथे दसऱ्यानिमित्त पारंपरिक पद्धतीने सीमोल्लंघन साजरे करण्यात आले. ग्रामदैवत श्री लक्ष्मीमातेच्या पालखीची मिरवणूक ढोल-ताशांच्या गजरात काढून गावामधून सीमोल्लंघनासाठी प्रस्थान केले.
दसऱ्याच्या निमित्ताने श्री लक्ष्मीमाता मंदिरात नवरात्रात नित्यनेमाने धार्मिक पूजाअर्चा, महाआरती, अभिषेक, जागर, व्याख्यानासह महिलांसाठी सांस्कृतिक कार्यक्रमांचे आयोजन केले होते. गुरुवारी (ता. २) सकाळी घट विसर्जनानंतर सायंकाळी ग्रामदैवत श्री लक्ष्मीमातेच्या पालखीची गावांतर्गत सवाद्य मिरवणूक काढली.
सीमोल्लंघनाच्या प्रसंगी पालखीचा मार्ग ढोल-ताशा नागरिकांच्या सहभागाने भारावून गेला होता. श्री लक्ष्मीमाता पालखीची मिरवणूक नियोजित मार्गाने काढून सीमोल्लंघन स्थळी पोहोचली. याठिकाणी सायंकाळी साडेसहा वाजता गावचे मानकरी उत्तमराव घुले यांच्या हस्ते आपट्याच्या पानांची पूजा केली. यावेळी दत्ता चव्हाण, अमोल घुले, जालिंदर मोरे, सागर बागडे, आदित्य घुले, अशोकराव पोतदार, विजय शिंदे, बाबूराव दगडे, दत्तात्रेय भुजबळ, अशोक रणनवरे, दीपक जाधव, नीलेश गोरे, दत्तात्रेय शिंदे, अनंतराव शिंदे, भारत घोलप आदी उपस्थित होते.
दसऱ्यानिमित्त मंदिर परिसर फुलांनी सजविण्यात आला होता. यावेळी ग्रामपुरोहित नारायण कुलकर्णी, सचिन घोडके यांनी पौरोहित्य केले.