वाल्हे, ता. १९ : शाळांना दिवाळीची सुट्टी लागल्यानंतर नीरा व वाल्हे परिसरातील चिमुकल्या ‘बाल मावळ्यां’मध्ये उत्साहाची लाट उसळली असून, अंगणात माती, दगड, कागद व कल्पकतेच्या साहाय्याने ऐतिहासिक किल्ल्यांची प्रतिकृती साकारण्याचा ध्यास त्यांनी घेतला आहे. घराघरांत शिवकालीन इतिहास जिवंत होत असून, दरवर्षीप्रमाणे यंदाही बच्चेकंपनी पुरंदर, प्रतापगड, राजगड अशा गडकोटांच्या आठवणी घराच्या दारातच उभ्या करत आहे. प्लॅस्टिक बाटल्या, जुन्या वस्तू, माती, झाडांची फुलं, पानं, गवत, सलाईनच्या बाटल्या आणि रंगीबेरंगी सजावटीतून हे किल्ले लक्ष वेधून घेत आहेत. दिवाळीतील ही कलात्मक परंपरा टिकवताना मुलांच्या चेहऱ्यावरचा आनंद ओसंडून वाहतो आहे. बालकलाकार स्वतःच छत्रपती शिवाजी महाराज, मावळे, तानाजी मालुसरे यांचे रोल-मॉडेल्स तयार करून त्या प्रतिकृती किल्ल्यांवर मांडत आहेत. काही ठिकाणी गडांवरील गुहा, बुरूज, दरवाजे, कारंजे, तलाव अशा बारकाव्यांवरही विशेष भर दिला जात आहे.

यंदा बाजारात रेडिमेड किल्ल्यांनाही मोठी मागणी असून, बाल्कनी किंवा टेबलावर ठेवता येतील अशा तयार किल्ल्यांसाठी पालकही मुलांना प्रोत्साहन देताना दिसत आहेत. तसेच विविध खेळणी, शिवरायांच्या मूर्ती, सैनिक, वाघ, सिंह, झाडं, डोंगर, आणि शोभेच्या वस्तूंनी बाजारपेठा सजल्या आहेत.
दिवाळीचा उत्सव किल्ल्यांच्या रूपाने साजरा होत असताना, मुलांच्या कल्पकतेने आणि ऐतिहासिक जाणिवांनी सजलेली ही परंपरा जपण्याचे कार्य कौतुकास्पद
आहे.