वाल्हे, ता. २१ : नीरा (ता. पुरंदर) येथे यंदाचे लक्ष्मीपूजन वेगळ्या अर्थाने साजरे करण्यात आले. इथे लक्ष्मीपूजन फक्त मूर्तीचे नव्हे, तर ज्ञान, आत्मनिर्भरता आणि सशक्तीकरणाचे प्रतीक ठरले.
गणेश कॉम्प्युटर प्रशिक्षण केंद्राचे संचालक नितीन भोसले यांनी नीरा व थोपटेवाडी परिसरातील दहा ते पंधरा मुलींना मोफत संगणक प्रशिक्षण देऊन त्यांचा आत्मविश्‍वास वाढविला. प्रशिक्षण पूर्ण झाल्यानंतर मंगळवारी (ता. २१) दिवाळीच्या लक्ष्मीपूजन दिवशी या मुलींना प्रमाणपत्र देऊन ‘ज्ञानरूपी लक्ष्मीचे पूजन’ केले. यामध्ये सहभागी झालेल्या पंधरा मुलींनीही कार्यक्रमात उत्स्फूर्त सहभाग नोंदविला. संगणक शिक्षण म्हणजे केवळ तांत्रिक कौशल्य नव्हे, तर मुलींना नवा आत्मसन्मान, भविष्यासाठी दिशा आणि आर्थिक स्वावलंबनाची उमेद मिळवून देणारा टप्पा आहे. अशा प्रकारे प्रत्यक्ष कृतीतून लक्ष्मीपूजन केल्याचा हा आगळा अनुभव ठरला. यावेळी सृष्टी ढमाळ, संस्कृती दोशी, साक्षी बारवकर, पौर्णिमा शिंदे, सलोनी निगडे, सई बारवकर, ईषिता कदम, प्रांजल गायकवाड आदींसह पालक व ग्रामस्थ उपस्थित होते.
दरम्यान, यावेळी महिलांसाठी एआय आणि सायबर सुरक्षा विषयावर जनजागृती व प्रशिक्षणाबाबत मार्गदर्शन केल्याचे संचालिका वंदना भोसले यांनी सांगितले. भोसले यांचा उपक्रम पाहून अनेकांनी कौतुकाची थाप दिली आणि समाजासाठी काहीतरी वेगळे करण्याची प्रेरणा घेतली.