वाल्हे, ता.५ : आडाचीवाडी(ता.पुरंदर) येथील अरविंद जंगल पवार यांच्या घराबाहेर मध्यरात्री बिबट्या अवतरला. बिबट्याने त्यांच्या पाळीव कुत्र्यावर हल्ला केला, मात्र कुत्र्याने आपल्या सहा पिल्लांच्या बचावासाठी प्रतिहल्ला चढविला. या प्रयत्नात बिबट्याने पिल्लांना सोडून, कुत्र्याला घेऊन पोबारा केला. हा प्रकार पाहून पवार कुटुंबीयांच्या काळजाचा थरकाप उडाला होता.
मंगळवारी नेहमीप्रमाणे जनावरे, शेळ्या गोठ्यात बांधल्यानंतर शेजारी घरात झोपलेल्या अरविंद पवार यांना मध्यरात्री दोनच्या दरम्यान कुत्र्याचा जोरात भुंकण्याचा आवाज आला. जाग आल्यानंतर पवार यांनी त्यांचा मुलगा ओंकारसह घराबाहेर धाव घेतली असता बिबट्या व त्यांचा पाळीव कुत्रा यांची झटापट सुरू झाल्याचे त्यांनी पाहिले. यावर त्यांनी आरडाओरडा केल्यानंतर त्यांच्या आवाजाने बिबट्याने कुत्र्याच्या पिल्लांना जागेवर सोडून पाळीव कुत्र्याला घेऊन पोबारा केला. पवार यांनी बॅटरीने आजूबाजूला पाहिले असता अंधारामध्ये बिबट्या पळून जात असल्याचे त्यांना दिसला असल्याचे ओंकार पवार यांनी सांगितले. आडाचीवाडी परिसरात रात्रीच्या या घटना भय इथले संपत नाही हे स्पष्ट करत असून या प्रकारामुळे नागरिकांची सुरक्षितता धोक्यात आली आहे. परिसरात सलग हल्ले होत असल्याने ग्रामस्थांमध्ये बिबट्याबाबत भीती वाढली असून प्रशासनाने तत्काळ उपाययोजना करावी, अशी मागणी ग्रामस्थांमधून जोर धरत आहे.