वाल्हे, ता. ५ : पुरंदर तालुक्यातील वाल्हे जवळील माळवाडी येथे मध्यरात्री चोरीची घटना घडली. माळवाडी येथील ज्येष्ठ महिला इंदूबाई हरिभाऊ भुजबळ यांच्या राहत्या घरामागील बंद खोलीचा कडी-कोयंडा तोडून चोरट्यांनी कपाटातील ऐवज चोरी करून नेला. या घटनेमुळे परिसरात भीतीचे वातावरण निर्माण झाले आहे.
इंदूबाई भुजबळ यांच्या शेजारी-शेजारी तीन खोल्या आहेत. त्यातील पुढील खोलीमध्ये त्या कुटुंबीयांसह झोपल्या होत्या. मध्यरात्री दोनच्या सुमारास शेजारील कुत्र्यांचा भुंकण्याचा आवाज येण्यास सुरुरवात झाल्यावर भुजबळ यांना जाग आली; मात्र त्याकडे दुर्लक्ष करीत त्या झोपी गेल्या. घटनेच्या वेळी इंदूबाई भुजबळ यांच्या शेजारी राहणारे त्यांचे पुतणे मुंबई पोलिस दलात कार्यरत सुधीर भुजबळ हे सुट्टीनिमित्त गावी आले होते. मंगळवारी मध्यरात्री सुमारास त्यांच्या घराबाहेर उभी असलेल्या मोटारीच्या सायरन वाजण्यास सुरुवात झाली. त्यांनी तत्काळ बाहेर येऊन पाहणी केली; परंतु कोणीही दिसले नाही. यानंतर त्यांनी आजूबाजूला शोध घेतला असता त्यांच्या समोरील राहणाऱ्या त्यांच्या चुलती इंदूबाई भुजबळ यांच्या घराचा दरवाजा उघडा दिसला. त्यांनी तत्काळ मोबाइलद्वारे इंदूबाई भुजबळ यांना याची कल्पना दिली. घरात पाहणी केल्यावर चोरट्यांनी घरामागील बंद खोलीत प्रवेश करून कडी-कोयंडा तसेच कपाटाचे लॉक तोडले, साहित्य अस्ताव्यस्त केले आणि कपाटातील रोख रक्कम, पैंजण-पट्टया आदी मौल्यवान वस्तू चोरी केल्याचे निदर्शनास आले. या घटनेबाबत इंदूबाई भुजबळ यांनी बुधवारी (ता. ५) सकाळी वाल्हे पोलिस दूरक्षेत्रात तक्रार दाखल केली. दुपारी हवालदार भाऊसाहेब भोंगळे यांनी घटनास्थळी येऊन पंचनामा केला.