वाल्हे, ता. २० : सैनिकांचे गाव म्हणून ओळख असलेल्या पिंगोरी (ता. पुरंदर) येथील शिंदेनगर परिसरात शेतात काम करत असताना एका ज्येष्ठ नागरिकावर अचानक बिबट्याने हल्ला केला. अचानक समोर आलेल्या बिबट्याने डरकाळी फोडली, मात्र शिंदे यांनी धैर्य न गमावता हातातील काठीच्या साहाय्याने प्रतिकार केला. त्यांच्या सतर्कतेमुळे मोठा अनर्थ टळला. पायाला दुखापत झाली असतानाही बिबट्याचा प्रतिकार करून स्वतःचे रक्षण केलेल्याने मोठा अनर्थ टळला.
श्रीरंग शिंदे हे नेहमीप्रमाणे शनिवारी (ता. २०) सकाळी नऊच्या सुमारास जनावरे बांधण्यासाठी शेतामध्ये गेले होते. जनावरे बांधत असताना अचानक अवघ्या दहा फूट अंतरावरून बिबट्याने डरकाळी फोडत त्यांच्या दिशेने उडी मारली. बिबट्या अंगावर आल्याने घाबरलेले शिंदे शेतात खाली पडले आणि त्यांच्या पायाला दुखापत झाली. काळ आला होता, मात्र प्रसंगावधान राखत आणि धैर्य न सोडता शिंदे यांनी हातातील काठीचा उपयोग करून बिबट्याचा प्रतिकार केला आणि स्वतःचे रक्षण केले. या थोडक्यात केलेल्या प्रयत्नामुळे मोठा अनर्थ टळला धैर्य आणि प्रसंगावधान दाखवत शिंदे यांनी हातातील काठीचा उपयोग करून बिबट्याचा प्रतिकार करत आरडाओरडा केल्याने बिबट्या घाबरून शेजारील ज्वारीच्या शेतातून पसार झाला. घटनेनंतर स्वतःला सावरत शिंदे यांनी या घटनेची माहिती माजी सरपंच जीवन शिंदे यांना दिली. जीवन शिंदे यांनी तत्काळ वनविभागाला याबाबत कळवून परिसरात बिबट्याचा बंदोबस्त करण्याची मागणी केली. दरम्यान, वनविभागाने घटनास्थळी भेट देऊन पाहणी करावी बिबट्याचा शोध घेऊन पिंजरा लावावा तसेच शेतकरी व ग्रामस्थांच्या सुरक्षिततेसाठी तातडीची उपाययोजना करावी, अशी मागणी सरपंच संदीप यादव यांनी केली आहे. या घटनेमुळे शेतात कामासाठी जाणाऱ्या शेतकऱ्यांनी व नागरिकांनी विशेष खबरदारी घ्यावी, असे आवाहनही करण्यात आले आहे.