यवत, ता. २७ : यवत स्टेशन (ता. दौंड) येथील एका मंदिरातील मूर्ती शुक्रवारी (ता. २६) रात्री अज्ञाताकडून फोडण्यात आल्याने यवत गावात तणावाचे वातावरण आहे. गाव बंद ठेवून या गोष्टीचा निषेध करण्यात आला.
यवत स्टेशन रस्त्यालगत या मंदिरातील मूर्ती शुक्रवारी रात्री फोडण्यात आली. त्यामुळे संपूर्ण यवत गावात तणाव निर्माण झाला आहे. याबाबतच माहिती सकाळी समजताच गावामधील व्यावसायिकांनी दुकाने स्वयंस्फूर्तीने बंद ठेऊन निषेध व्यक्त केला. यानंतर गावातील सर्व समाजातील नागरिकांनी एकत्र येऊन यवत पोलिस ठाण्यासमोर निषेध मोर्चा काढला. मूर्ती फोडल्याप्रकरणी पोलिसांनी अज्ञात व्यक्ती विरुद्ध गुन्हा दाखल केला आहे. यावेळी उपविभागीय पोलिस अधिकारी बापूराव दडस यांनी घटनेची माहिती घेऊन आरोपीला तत्काळ अटक केली जाईल, अशी ग्वाही दिली.
दरम्यान, ग्रामस्थांतर्फे श्री काळभैरवनाथ मंदिरासमोर निषेध सभा घेण्यात आली. प्रशांत शिवणकर, कुंडलिक खुटवड, उत्तम गायकवाड, दत्तात्रेय डाडर, गणेश आखाडे, सूरज चोरगे, सचिन यादव दादा माने, मयूर दोरगे, श्रीपती दोरगे, दीपक मोटे यांनी निषेध व्यक्त केला. आरोपीला अटक केली नाही तर पुन्हा मोर्चाचे आयोजन केले जाईल, असे यावेळी जाहीर केले.
पोलिसांनी बंदोबस्तात वाढ करून परिस्थिती नियंत्रणात ठेवली आहे.