यवत, ता. ५ : यवत (ता. दौंड) येथील सामाजिक कार्यकर्ते समीर सय्यद यांनी पुढाकार घेत मुस्लिम समाजाची बैठक बोलावून पूरग्रस्तांच्या मदतीसाठी प्रस्ताव मांडला. सर्वांनी त्यास प्रतिसाद दिला. मराठवाड्यातील
मुस्लिम युवकांनी निधी एकत्र करून जीवनावश्यक वस्तूंचे १५० किट तयार केले. या किटमध्ये तांदूळ, साखर, तूरडाळ, तेल, मसाले आणि मीठ यांचा समावेश होता. सय्यद यांनी खासदार ओमराजे निंबाळकर यांच्याशी संपर्क साधून पूरग्रस्तांना मदतीची कल्पना मांडली. ओमराजे यांनी तातडीने भूम- परांडा येथील प्रांत अधिकारी डोंगरे यांच्याशी संपर्क करून दिला. डोंगरे यांनीही मुस्लिम समाजाच्या या उपक्रमाचे कौतुक केले.
सय्यद यांनी सांगितले की, ‘‘पूरग्रस्त भागातील परिस्थिती पाहून ब्लँकेट, शालेय साहित्य आणि शेतीसाठी आवश्यक वस्तू पाठवण्याचा आम्हा सर्व मुस्लिम समाजाचा मानस आहे. विशेष म्हणजे, पुरामुळे दिवाळी साजरी करू न शकणाऱ्या कुटुंबांसाठी यवतच्या मुस्लिम समाजातर्फे फराळाचे किट तयार करून पाठवले जाणार आहेत.’’
दौंडचे आमदार राहुल कुल यांनीही समाजाच्या या उपक्रमाचे कौतुक केल्याचे सय्यद यांनी सांगितले.

01501