कोथरूड, ता. १ ः पुणे शहरासाठी महत्त्वाकांक्षी असलेल्या २४ तास पाणीपुरवठा योजनेसाठी जलवाहिनी टाकण्याचे काम कर्वेनगर भागातील सहवास सोसायटी परिसरात सुरू आहे. १५ एप्रिल रोजी सुरू झालेले हे काम दोन महिन्यात पूर्ण होणे अपेक्षित होते. परंतु अद्यापही हे काम पूर्ण न झाल्याने परिसरातील नागरिकांना नाहक त्रासाला सामोरे जावे लागत आहे.

शहरात ज्या जल, मल, विद्युत, गॅस वाहिन्या टाकल्या आहेत त्यांचे कोणतेही नकाशे आपल्याकडे उपलब्ध नाहीत. त्यामुळे या कामाला विलंब होत आहे. त्याचा परिणाम म्हणून धुळीचा त्रास, वाहतूक कोंडी, वेळ वाया जाणे, वाहिनी फुटल्यावर संबंधित सोसायट्यांची अडचण होणे आदी त्रास आम्हाला सहन करावे लागत आहेत. प्रशासनाच्या ढिसाळ आणि नियोजनशून्य कारभारामुळे सर्वांनाच अडचणीला तोंड द्यावे लागत आहे, असे चिंतामणी सोसायटीतील शंतनू खिलारे म्हणाले.

याबाबत विक्रम पेंडसे म्हणाले की, सुदैवाने आमच्या परिसरातील काम संपले आहे. इतर वाहिन्यांचा अडथळा असल्याने येथील काम संथगतीने सुरू होते. आता हे काम भुजबळ बंगला चौकाजवळ येऊन स्थिरावले आहे. त्यामुळे या चौकात वाहतूक कोंडी होत आहे.

सध्या जेथे काम सुरू आहे. तेथे ८ मीटरच्या भागात ११ सेवावाहिन्या आहेत. यामध्ये ९ उच्चदाब वाहिन्या, एक मलवाहिनी व जलवाहिनी आहे. एखादी वाहिनी लागली की तिच्या खालूनच पाइप काढावा लागतो. उच्चदाब वाहिनीला धक्का लागला तर त्याच्या एका दुरुस्तीला लाखो रुपयांचा खर्च करावा लागतो. तीनशे मीटरची वाहिनी टाकण्यासाठी आम्हाला तीन महिने लागले. मागच्या महिन्यात मी दोनच पाइप टाकू शकलो. सोसायटी परिसरात वेगवेगळ्या वाहिन्यांचे जाळे आहे. त्यातून काम करणे अवघड व वेळखाऊ होते. त्यामुळे मी जे काम घेतले ते तोट्यात गेले. त्यामुळे हे काम मी बंद केले होते. पण आता पुन्हा हे काम करायला घेतले आहे.
- अभिषेक सारडा, उप कंत्राटदार