पुणे, ता. ३ ः पंतप्रधान आवास योजनेअंतर्गत पुणे महापालिकेतर्फे खराडी येथील सर्व्हे क्रमांक ५७ मध्ये सुरू असलेल्या प्रकल्पातील घरे गरजूंना मिळत नसून अन्य लोकांना मिळत आहेत. त्यामुळे महापालिका आयुक्तांनी याबाबत तातडीने चौकशी करून कारवाई करावी, अशी मागणी परिसरातील रहिवासी अशोक भाट, भरत विटकर यांनी पत्रकार परिषदेत सोमवारी केली.
या ठिकाणी सोडत पद्धतीने घरे दिली जाणार असल्याचे सुरुवातीला सांगण्यात आले. मात्र, कोरोनाकाळात ज्यांनी घरे मिळण्यासाठी अर्ज केले होते, त्यातील काहींना घरे मिळाली. पण, अनेकांना वेळेत पैसे भरता आले नाहीत. त्यामुळे त्यांची नावे रद्द झाली. महापालिकेने ‘प्रथम येणाऱ्यास प्राधान्य’ या तत्त्वाची घोषणा केली होती. परंतु, काही अधिकाऱ्यांच्या धोरणामुळे गरजू नागरिकांना याचा लाभ मिळत नसून, अन्य लोकांनाच या घरांचे वाटप होत आहे. त्यामुळे आयुक्तांनी चौकशी करून संबंधितांवर योग्य ती कारवाई करावी, अशी मागणी अशोक भाट आणि भरत विटकर यांनी केली. यावेळी योजनेअंतर्गत अर्ज करणारे रहिवासी अशोक लष्करे, अयाझ पटवेकर, राजेश भान, अजहर शेख आदी उपस्थित होते.