सकाळ वृत्तसेवा
छत्रपती संभाजीनगर, ता. १५ : वीज वितरण कंपनी अर्थात महावितरणने स्टेट बँक ऑफ इंडियाच्या १२ हजार ८०० कोटी रुपयांच्या कर्जाची मुदतीपूर्वी एकाच हप्त्यात नुकतीच परतफेड केली. अन्य वित्तीय संस्थेकडून कमी व्याज दराचे कर्ज उभारून तसेच स्वनिधीतून ही परतफेड केली. त्यामुळे व्याजाच्या रकमेत मोठी बचत होईल, अशी माहिती अध्यक्ष तथा व्यवस्थापकीय संचालक लोकेश चंद्र यांनी दिली.
महावितरणने विविध टप्प्यांवर स्टेट बँकेकडून एकूण १२ हजार ८०० कोटी रुपयांचे कर्ज घेतले होते. त्यासाठी ८.६५ टक्के ते ९.२५ टक्के दराने व्याज द्यावे लागत होते. त्याऐवजी अन्य वित्तीय संस्थेकडून सात हजार १०० कोटी रुपये कर्ज ८.२५ टक्के इतक्या कमी व्याजदराने उभारून महावितरणने स्टेट बँकेचे सात हजार १०० कोटी रुपयांचे कर्ज फेडले. त्या खेरीज महावितरणने स्वनिधीतून पाच हजार ६३४ कोटी रुपयांचे स्टेट बँकेचे कर्ज फेडले.
महावितरणने स्टेट बँकेचे कर्ज घेताना आपल्या दहा मंडळांमधील महसूल तारण म्हणून ठेवला होता. या मंडळांमध्ये वार्षिक तीस हजार कोटी रुपयांचा महसूल आहे. स्टेट बँकेचे सर्व कर्ज फेडल्याने हा महसूल तारणमुक्त होईल. त्या आधारे कंपनीला ५० हजार कोटी रुपयांपर्यंतचा निधी माफक व्याजदरात कर्जरूपाने उभा करता येईल.

वित्तीय बाजारातील पत वाढली
महावितरणने एकाच हप्त्यात कर्जाची मुदतपूर्व परतफेड केल्याने कंपनीची वित्तीय बाजारातील पत वाढली आहे. कंपनीसाठी भविष्यात खासगी किंवा सार्वजनिक रोखे उभारायचे झाल्यास त्यासाठीही एवढ्या मोठ्या कर्जाची परतफेड करणे उपयुक्त ठरणारे आहे. आगामी काळात महावितरणला शेअर बाजारात सूचिबद्ध करण्याच्या दृष्टीनेही ही कर्जाची परतफेड महत्त्वाची आहे.