फुरसुंगी, ता. ११ : ‘सकाळ’ने बातमी प्रसिद्ध केल्यानंतर त्याची दखल घेत फुरसुंगीतील महामार्गावर पडलेले खड्डे बुजविण्यास राष्ट्रीय महामार्ग विभागाकडून सुरुवात करण्यात आली आहे. त्यामुळे परिसरातील नागरिकांकडून ‘सकाळ’चे आभार व्यक्त केले आहे.
फुरसुंगीतील महामार्गाच्या दुरवस्थेबाबत ‘पालखी महामार्गावर खड्डे अन् कोंडी’ या शीर्षकाची ‘सकाळ’ने नुकतीच बातमी प्रसिद्ध केली होती. परतीच्या पावसाने रस्ता अक्षरशः वाहून गेला असून त्यावर दोन फुटापर्यंत खड्डे पडलेले आहेत. पावसाळ्यापूर्वी खड्डे बुजविण्यासाठी वापरण्यात आलेला मुरूम पावसाने वाहून गेल्याने खड्डे पुन्हा मोकळे झाले आहेत. रस्त्याच्या कडा धोकादायक झाल्या आहेत. यामुळे येथील वाहतूक संथ होऊन नागरिकांना खड्ड्यांसोबत कोंडीचा सामना करावा लगत आहे. यावर उपाय म्हणून डांबरीकरण हा एकच पर्याय आहे, हे वास्तव या बातमीतून प्रशासनासमोर मांडण्यात आले होते. येथील परिस्थितीवर गांभीर्याने विचार करून प्रशासनाने येथील डांबरीकरणाला सुरवात केली आहे. त्यामुळे नागिरकांना दिलासा मिळाला आहे.