समाधान काटे : सकाळ वृत्तसेवा

शिवाजीनगर, ता. ९ : वडारवाडी येथील महापालिकेचे डॉ. होमी भाभा रुग्णालयाच्या नूतनीकरणासाठी पाच वर्षांचा दीर्घ काळ लोटला तरीदेखील पूर्ण क्षमतेने रुग्णालय सुरू झालेले नाही. या ठिकाणी महिन्याला पन्नास ते पंचावन्न गरोदर मातांची नोंद होते. या ठिकाणी प्रसूतीची सोय उपलब्ध नसल्याने महिलांना खासगी रुग्णालयात किंवा महापालिकेच्या दळवी, कमला नेहरू किंवा ससून रुग्णालयाकडे जावे लागते.
मागील वर्षी रुग्णालय सुरू केले तरीदेखील येथे रुग्णांना ॲडमिट करण्याची सोय उपलब्ध नाही. महापालिकेच्या लालफितीच्या कारभाराने सामान्य रुग्णांचे हाल होत आहेत. या परिसरात राहणाऱ्या सर्वसामान्य रुग्णांना डॉ. भाभा रुग्णालयाचा मोठा आधार मिळतो, मात्र अपुरे उपचार असल्याने रुग्णांना इतर रुग्णालयाकडे धाव घ्यावी लागते. ‘‘या रुग्णालयाचे काम लवकर पूर्ण करून पूर्ण क्षमतेने रुग्णालय सुरू करावे,’’ अशी प्रतिक्रिया स्थानिक रहिवासी संदीप काळे यांनी दिली. अधिक माहितीसाठी महापालिका आरोग्य अधिकारी डॉ. नीना बोराडे यांच्याशी संपर्क केला असता प्रतिसाद मिळाला नाही. महापालिका भवन विभागाचे कनिष्ठ अभियंता उमेश कुरे यांनी सांगितले की, तिसऱ्या मजल्याची बांधकामविषयक कामे सुरू असून अंदाजे दोन महिन्यांत संपूर्ण कामे पूर्ण होतील.

प्रलंबित कामे
- हिरकणी कक्ष
- शस्त्रक्रिया विभाग
- लिफ्ट सुरू करणे
- सुरक्षारक्षक खोली सुरू करणे
- शेवटच्या मजल्याची बांधकामविषयक कामे

बुलेट्स
- आजपर्यंत झालेला खर्च : पावणेचार कोटी
- निधीची आवश्यकता : पन्नास लाख
- काम पूर्ण करण्याचे उद्दिष्ट : दोन महिने
- कर्मचारी आवश्यकता : दोन परिचारिका आणि एक कायमस्वरूपी फार्मासिस्ट
- अस्वच्छता दुर्गंधी : दुसऱ्या मजल्यावरील स्वच्छतागृहात अस्वच्छता, दुर्गंधी पसरली आहे.

चारमजली रुग्णालय
- तळमजला : वाहनतळ (पार्किंग)
- पहिला मजला : बाह्यरुग्ण विभाग (ओपीडी)
- दुसरा मजला : शस्त्रक्रिया विभाग
- तिसरा मजला : प्रसूतिगृह
- चौथा मजला : कर्मचारी निवास

सध्या होत असलेले उपचार
प्राथमिक तपासण्या, गरोदर माता तपासणी, लसीकरण, रक्त, लघवी, कावीळ, साखर (शुगर) तपासणी. लहान मुलांचे लसीकरण. सांधेदुखी, क्षयरोग, एचआयव्ही तपासणी आदी.

डॉ. भाभा रुग्णालयात प्रसूतीची सुविधा नसल्याने दळवी रुग्णालयात तपासणीसाठी प्रत्येक महिन्याला जावे लागते. भाभा रुग्णालयात सुविधा उपलब्ध झाल्या, तर महिलांना इतरत्र भटकावे लागणार नाही.
- रोहिणी यमकर, गरोदर महिला