समाधान काटे

शिवाजीनगर, ता. १३ : शहराच्या प्रमुख रस्त्यांपैकी गणल्या जाणाऱ्या जंगली महाराज रस्त्यावर दिवसेंदिवस अतिक्रमण वाढत आहे. पदपथांवरून पादचाऱ्यांना चालणे कठीण झाले आहे. मोबाईल दुकानदारांनी पदपथावर मोठमोठे जाहिरात फलक लावले असून दुचाकी-चारचाकी वाहने थेट पदपथावर उभी केली जात आहेत. हातगाड्या, मोबाईल वस्तूंची दुकाने आणि इतर साहित्यामुळे पदपथ पूर्णपणे व्यापले गेले आहेत.
पादचाऱ्यांना रस्त्यावर उतरून चालावे लागत असल्याने अपघाताचा धोका वाढला आहे. या परिसरात शाळा आणि महाविद्यालये असल्याने विद्यार्थी, पालक, ज्येष्ठ नागरिक मोठ्या प्रमाणात पादचारी मार्गाचा वापर करतात. मात्र, त्यांना चालण्यासाठी पदपथ शिल्लक राहिलेला नाही. वाहतूक विभागाकडून ठराविक दुकानांसमोर किंवा काही मोजक्या गाड्यांवरच कारवाई केली जाते. एका नामांकित हॉटेलसमोर रस्त्यावर अनधिकृतरीत्या उभ्या केलेल्या गाड्यांवर कारवाई होत नसल्याचे दिसून येते. अतिक्रमण विभागाकडून सातत्याने कारवाई न केल्याने अनधिकृत टपऱ्या, हातगाड्या आणि स्टॉलची संख्या वाढली आहे. पादचाऱ्यांना चालण्यासाठी महापालिकेने पदपथ मोकळा करून द्यावा, अशी मागणी होत आहे.

अशी आहे स्थिती
- एका नामांकित हॉटेलच्या खुर्च्या पदपथावर
- पदपथावरील सिमेंट वीटा उखडल्याने मार्गात अडथळे
- नामांकित कंपनीच्या चारचाकी पदपथावर; वाहतूक विभागाकडून कारवाईत दुजाभाव
- अतिक्रमण विभागाला न जुमानता पदपथावर हातगाड्या

मोठ्या प्रमाणावर विद्यार्थी, ज्येष्ठ नागरिक जंगली महाराज रस्त्यावरील पादचारी मार्गाचा वापर करतात. परिसरात जंगली महाराज मंदिर असल्याने दररोज अनेक भाविक, भक्त दर्शनासाठी येतात. या सर्वांना चालण्यासाठी पदपथ मोकळा असणे गरजेचे आहे. प्रशासनाने याकडे लक्ष घालून नियमित कारवाई करायला हवी.
- प्रा. डॉ. जोत्स्ना एकबोटे

अतिक्रमण संदर्भात माझ्याकडेही दोन-तीन तक्रारी प्राप्त झाल्या आहेत. मुख्य खात्याचे अधिकारी व कर्मचारी घेऊन संयुक्तपणे कारवाई केली जाईल.
- सचिन उथळे, अतिक्रमण निरीक्षक, शिवाजीनगर-घोले रस्ता क्षेत्रीय कार्यालय

नो पार्किंगमध्ये उभ्या असलेल्या गाड्यांवर आम्ही नियमित कारवाई करत असतो. मी स्वतः त्या ठिकाणी थांबून कारवाई करून घेतो.
- पी. डी. दोरकर, सहाय्यक पोलिस निरीक्षक, वाहतूक विभाग