जेजुरी, ता. १५ : जेजुरीच्या खंडोबा गडावर रविवारी (ता. १५) भाविकांची मोठी गर्दी झाली होती. यावेळी दुपारी साडेअकरा वाजता पूर्व दरवाजाने गडावर येणाऱ्या एका भाविकाला सुरक्षा रक्षकाने हातातील फायबरच्या काठीने केलेल्या मारहाणीत एक भाविक गंभीर जखमी झाला.
आकाश कैलास शेटे (वय २६, रा. गल्ले बोरगाव, ता. खुलताबाद, जि. संभाजीनगर), असे जखमी झालेल्या भाविकाचे नाव आहे.
याबाबत जेजुरी पोलिस ठाण्यात सुरक्षारक्षक मच्छींद्र दोडके यांच्याविरुद्ध गुन्हा दाखल झाला आहे.
जेजुरी पोलिसांनी दिलेल्या माहितीनुसार, जखमी भाविक आकाश शेटे हे त्यांच्या परिवारासह रविवारी खंडोबाच्या देवदर्शनासाठी आले होते. दुपारी साडेअकरा वाजता पूर्व दरवाजातून गडामध्ये जाताना देवस्थानचा खासगी सुरक्षा रक्षक मच्छिंद्र दोडके याने त्यांना रोखले. ‘येथून खाली उतरायचा मार्ग आहे. वर जाऊ नका,’ असे सांगितले. मात्र, आकाश शेटे यांनी, ‘मी येथून गडावर जातो,’ असे सांगत असताना त्याने हातातील फायबरच्या काठीने मारहाण केली. यामध्ये उजव्या डोळ्यावर व नाकावर मार लागल्याने नाकाचे व तोंडाच्या जबड्याचे हाड तुटले, उजव्या डोळ्याला गंभीर दुखापत झाली. येथील आनंदी हॉस्पिटलमध्ये या भाविकांवर उपचार सुरू आहेत. त्यांच्या तक्रारीवरून जेजुरी पोलिसांनी गुन्हा दाखल केला.
याबाबत सहाय्यक पोलिस निरीक्षक दीपक वाकचौरे अधिक तपास करीत आहेत.