लोहगाव, ता. १५ : मुलाचे कर्ज फेडण्यासाठी माहेरहून पैसे आणावेत, यासाठी सुनेचा मानसिक आणि शारीरिक छळ केल्याचा धक्कादायक प्रकार उघडकीस आला आहे. या प्रकरणी विमानतळ पोलिस ठाण्यात पतीसह सासरच्या चौघांविरुद्ध गुन्हा दाखल करण्यात आला आहे.

या प्रकरणात २६ वर्षीय महिलेने दिलेल्या फिर्यादीवरून पती आदित्य अनिल लोखंडे (वय २८), सासरे अनिल किसन लोखंडे (वय ५३), सासू सुवर्णा अनिल लोखंडे (वय ४८) आणि नणंद समृद्धी अनिल लोखंडे (वय २५, सर्व रा. मरकळ, ता. खेड, जि. पुणे) या संशयितांविरुद्ध गुन्हा नोंदविण्यात आला आहे.

फिर्यादी यांच्या तक्रारीनुसार, त्यांचा विवाह ऑगस्ट २०२३ मध्ये लोहगाव येथे झाला होता. विवाहावेळी त्यांच्या वडिलांनी मोठ्या थाटामाटात लग्न लावून देत सुमारे ५५ तोळे सोने, दोन किलो चांदीची भांडी, इलेक्ट्रॉनिक वस्तू आणि फॉर्च्युनर गाडी दिली होती. मात्र, लग्नानंतर काही काळातच पती व्यसनाधीन व मोठ्या कर्जाखाली असल्याचे समोर आले.
त्यानंतरही फिर्यादीच्या वडिलांनी जावयाला वेळोवेळी आर्थिक मदत केली. वाढदिवसानिमित्त सोन्याचे दागिने व महागड्या भेटवस्तूही दिल्या. मात्र, एवढे सर्व करूनही पती, सासरे, सासू व नणंद यांच्याकडून फिर्यादीचा पैशांसाठी छळ सुरूच राहिला, असे फिर्यादीत म्हटले आहे. याप्रकरणी विमानतळ पोलिसांनी गुन्हा दाखल केला आहे.