महावितरणचा सहायक
अभियंता साठे निलंबित
आमदार खरेंच्या तारांकित प्रश्नामुळे कारवाई
सकाळ वृत्तसेवा
मोहोळ, ता. १५ : मोहोळ तालुक्यातील सीना नदीला गेल्या दोन महिन्यांपूर्वी आलेल्या महापुरामुळे नदीकाठच्या गावांचा विद्युतपुरवठा अद्यापही सुरळीत नाही, तो सुरळीत करण्यासाठी ट्रान्सफॉर्मर बसवावा लागतो. तो बसविण्यासाठी लांबोटी येथील विद्युत केंद्रातील सहायक अभियंता ओंकार साठे हा शेतकऱ्यांना पैसे मागत होता. याबाबतच्या तक्रारी शेतकऱ्यांनी आमदार खरे यांच्याकडे केल्या होत्या. आमदार खरे यांनी या बाबतचा तारांकित प्रश्न विधिमंडळात उपस्थित केला होता. त्याची दखल घेत सहायक अभियंता साठे याला निलंबित केल्याची माहिती आमदार राजू खरे यांनी दिली.
मोहोळ तालुक्यातून वाहणाऱ्या सीना नदीला सीना- कोळगाव धरणातून दोन ते तीन लाख क्युसेकने पाणी सोडण्यात आले होते. त्यामुळे नदीकाठच्या गावातील विद्युत महावितरणचे खांब पडले होते, तर अनेक ट्रान्सफॉर्मर पाण्यामुळे खराब झाले होते. गेल्या दोन ते तीन महिन्यांपासून पूरग्रस्त गावातील विद्युतपुरवठा सुरळीत नाही. त्यामुळे शेतकऱ्यांना शेती बागायत करता येईना तर जनावरांना व माणसांना पिण्याच्या पाण्याची अडचण निर्माण झाली आहे.
नदीकाठची गावे ही लांबोटी विद्युत केंद्राच्या आधिपत्याखाली येतात. लांबोटी येथील सहायक अभियंता ओंकार विष्णू साठे हा ट्रान्सफॉर्मर बसविण्यासाठी शेतकऱ्यांना पैसे मागत होता. तशा तक्रारी शेतकऱ्यांनी आमदार खरे यांच्याकडे केल्या होत्या. त्या तक्रारींची दखल घेत आमदार खरे यांनी विधिमंडळाच्या अधिवेशनात याबाबतचा तारांकित प्रश्न उपस्थित केला होता. त्याची दखल घेत सहायक अभियंता ओंकार साठे याला सोलापूर येथील महावितरणचे कार्यकारी अभियंता मनीषकुमार सूर्यवंशी यांनी सेवेतून निलंबित केले आहे.