कवठे येमाई, ता. १५ : विद्यार्थ्यांमध्ये उद्यमशीलता व प्रत्यक्ष व्यवहाराचे कौशल्य विकसित करण्यासाठी न्यू इंग्लिश स्कूल व ज्युनिअर कॉलेज ऑफ आर्ट्स कवठे येमाई (ता. शिरूर) येथे ‘सक्षम’ उपक्रमांतर्गत शनिवारी (ता. १३) खाद्य आनंददायी मेळावा घेण्यात आला.
शाळेच्या आवारात भरविण्यात आलेल्या या उपक्रमास ग्रामस्थांचा उत्स्फूर्त प्रतिसाद होता. या मेळाव्यात विद्यार्थ्यांनी स्वतः तयार केलेल्या खाद्यपदार्थांचे स्टॉल उभारले होते. चहा, कांदापोहे, पाणीपुरी, इडली, बिर्याणी, भेळ यांसह विविध पदार्थांची विक्री करण्यात आली. तसेच काही विद्यार्थ्यांनी भाजीपाला बाजार भरवून प्रत्यक्ष खरेदी-विक्रीचा अनुभव घेतला. ग्रामस्थांनी भाजीपाला खरेदी केली आणि विद्यार्थ्यांच्या उपक्रमाचे कौतुक केले. केवळ पुस्तकी ज्ञानापुरते शिक्षण न ठेवता विद्यार्थ्यांचा सर्वांगीण विकास साधण्यावर या उपक्रमातून भर दिला जात असल्याची माहिती प्राचार्य जगदीश टिकले यांनी दिली.
यावेळी पांडुरंग भोर, बाळासाहेब डांगे, गणेश रत्नपारखी, अविनाश पोकळे, रितेश शहा, गणेश रत्नपारखी, सोपान वागदरे, प्रशांत सांगडे, राजू कांदळकर, जवाहरलाल बाफना, डॉ. संतोष उचाळे, शरद साळवे आदींनी विद्यार्थ्यांना प्रोत्साहन दिले. उपक्रम यशस्वी करण्यासाठी प्राचार्य जगदीश टिकले व शिक्षकांनी परिश्रम घेतले.