कोथरूड, ता. १ : ‘ज्ञानबा-तुकाराम’, ‘विठ्ठल विठ्ठल जय हरी विठ्ठल’, ‘ज्ञानेश्वर माउली- तुकाराम’ असा गजर करत टाळ व ढोलकीच्या आवाजात पुणे जिल्हा प्राथमिक शिक्षक संघ, शिक्षण प्रसारक मंडळाच्या सौ. प्रतिभा पवार विद्यामंदिरात पालखी सोहळा उत्साहात साजरा झाला.
मुख्याध्यापक श्‍याम धुमाळ यांच्या हस्ते पालखीचे पूजन झाले. विद्यार्थ्यांनी संत ज्ञानेश्‍वर, निवृत्तिनाथ, मुक्ताबाई, तुकाराम, सोपानदेव, रामदास स्वामी, एकनाथ, नामदेव आदी संतांच्या वेशभूषा करून त्यांच्या कार्याची माहिती सांगितली, तसेच त्यांच्या जीवनातील काही प्रसंग सादर केले. सुनीता ढुमे यांनी वारकरी संप्रदायाचे महत्त्व सांगून संतांच्या कार्याचा आढावा घेतला. वारकरी मुला-मुलींनी रिंगण करून फुगडीचा आनंद घेतला. मोरे श्रमिक वसाहत, केळेवाडी, राऊतवाडी, हनुमाननगर या मार्गाने ही पालखी नेण्यात आली. परिसरातील नागरिकांनी पालखीचे दर्शन घेतले. या वेळी सुनीता ढुमे, उद्धव डेरे, विठ्ठल पवार, अमोल समगीर, नारायण शिंदे, नंदा कोकरे, संतोष पवार, शहाजी जगताप व पालक प्रतिनिधी उपस्थित होते. शुभांगी राऊत यांनी सूत्रसंचालन केले.