पुणे, ता. २४ : केंद्र सरकारने वस्तू व सेवा करात (जीएसटी) कपात केल्याने जवळपास ९० टक्के जीवनावश्यक वस्तूंवरील जीएसटी कमी झाला आहे. या पार्श्वभूमीवर शहर भाजपतर्फे बुधवारी लक्ष्मी रस्त्यावर व्यापारी आणि ग्राहकांशी संवाद साधण्यात आला.
केंद्रीय राज्यमंत्री मुरलीधर मोहोळ, शहराध्यक्ष धीरज घाटे आदी यात सहभागी झाले होते. लक्ष्मी रस्त्यावरील विविध दुकानांना भेट देत भाजप पदाधिकाऱ्यांनी व्यापाऱ्यांचे व ग्राहकांचे अभिप्राय जाणून घेतले. दरकपात केल्याबद्दल व्यापारी संघटनांनी भाजपचे अभिनंदन केले. मोहोळ म्हणाले, ‘जीएसटीमधील कपात ही केवळ आर्थिक सुधारणा नसून सामान्य माणसाच्या खिशाला दिलासा देणारे आणि व्यापार क्षेत्राला नवसंजीवनी देणारे ऐतिहासिक पाऊल आहे. व्यापाऱ्यांच्या अडचणी कमी होतील, तसेच लघु व मध्यम उद्योगांना मोठा हातभार लागेल.’