पुणे, ता. २४ ‘‘आजचा समाज हा अधिकाधिक आत्मकेंद्री होत चालला आहे, यामध्ये नकारात्मक भावना दिवसेंदिवस वाढत आहे. अशावेळी प्रामाणिकपणे आणि सचोटीने काम करणाऱ्या छोट्या संस्थांमुळे समाज योग्य रीतीने चालू आहे. आज खऱ्या अर्थाने माणूस घडविणारे संस्कार आणि शिक्षण देण्याची गरज आहे’’, अशी भावना ज्येष्ठ शिक्षणतज्ञ डॉ. अ. ल. देशमुख यांनी व्यक्त केली.
जनसज्जन सोशल वेल्फेअर फाउंडेशनतर्फे सामाजिक क्षेत्रातील योगदानासाठी विशेष मुलांना शिक्षण देणाऱ्या श्री साई एज्युकेशन ट्रस्ट या संस्थेला ‘आदर्श समाज प्रबोधन पुरस्कार’ प्रदान करण्यात आला. याप्रसंगी कीर्तनकेसरी ह. भ. प. चंद्रकांत महाराज वांजळे, फाउंडेशनचे अध्यक्ष प्रविण राठी, प्रभाकर सेलूकर, प्रदीप मोहोळ, नंदकिशोर एकबोटे आदी उपस्थित होते. पुरस्काराचे यंदा १३ वे वर्ष आहे.

चंद्रकांत वांजळे म्हणाले, ‘‘विशेष व्यक्तींकडे वेगळ्या प्रकारची ताकद असते. ते आपल्या बुद्धिमत्तेच्या जोरावर केवळ वैयक्तिक विकासच नव्हे तर समाजातही चांगले परिवर्तन घडवू शकतात, अशा व्यक्तींना आपण समाजात मुख्य प्रवाहात आणले पाहिजे. त्यांना विकासामध्ये आपल्याबरोबर घेणे हे आपले कर्तव्यच आहे.’’