पुणे, ता. २५ ः ‘‘तंत्रज्ञानामुळे प्रकाशन विश्वात बदल घडतो आहे. ई-बुक या दृक-श्राव्य माध्यमामुळे लेखकाच्या भावना अधिक उत्कटपणे वाचकांपर्यंत पोहोचतात, परंतु मूळ कथाबीज उत्तम असेल तरच कथेचा आशय वाचकांपर्यंत प्रभावीपणे पोहोचतो’’, असे मत स्टोरीटेलचे भारतातील सल्लागार प्रतिनिधी प्रसाद मिरासदार यांनी व्यक्त केले.
मराठी नववर्ष दिनानिमित्त कथा बाय स्नेहल बाकरे आणि झंकार स्टुडिओ पब्लिशिंगतर्फे ‘ब्लॉक ते ब्लॉग’ या ११ मराठी कथांच्या अक्षरोत्सवात ते ‘प्रकाशन व्यवसायाचे ग्लोबल स्वरूप’ या विषयी बोलत होते. याप्रसंगी दिलीपराज प्रकाशनचे संचालक राजीव बर्वे, स्नेहल बाकरे, सुनीता ओगले आदी उपस्थित होते.
या वेळी सुनीता ओगले लिखित ‘मैत्रीण’ या ऑडिओबुकचे प्रकाशन आणि या पुस्तकातील ‘अण्णा माझे चुकले का?’ या कथेचे अभिवाचन करण्यात आले. झंकार स्टुडिओचे संचालक सत्यजित पंगू यांनी प्रास्ताविक केले तर स्मिता कुलकर्णी यांनी सूत्रसंचालन केले.