पुणे, ता. २४ : पत्रकारितेतील मानाचा समजला जाणारा पत्रकार वरुणराज भिडे पुरस्कार जाहीर झाला असून, दैनिक ‘सकाळ’ च्या पुणे आवृत्तीचे सहयोगी संपादक सुरेंद्र पाटसकर यांना मुख्य पुरस्काराने गौरविले जाणार आहे. रोख रुपये पंचवीस हजार, स्मृतिचिन्ह असे पुरस्काराचे स्वरूप आहे.

शनिवारी (ता. २९) सकाळी १० वाजता पुणे श्रमिक पत्रकार संघाच्या सभागृहात या पुरस्काराचे वितरण होणार आहे. या वेळी आश्वासक पत्रकार पुरस्काराने ‘महाराष्ट्र टाइम्स’च्या चैत्राली चांदोरकर, ‘पुढारी’च्या सुषमा नेहरकर-शिंदे, ‘एबीपी माझा’च्या अभिजित कारंडे यांना सन्मानित केले जाणार असल्याची माहिती डॉ. सतीश देसाई यांनी सोमवारी पत्रकार परिषदेत दिली.

पुरस्काराचे हे २१ वे वर्ष आहे. मराठी पत्रकारितेत महत्त्वपूर्ण योगदान दिलेल्या पत्रकारास मुख्य पुरस्कार दिला जातो. तसेच पत्रकारितेत उल्लेखनीय कामगिरी केलेल्या पत्रकारांना आश्वासक पत्रकारिता पुरस्काराने सन्मानित केले जाते. शहरी व ग्रामीण भाग असे त्याचे स्वरूप आहे. तसेच वृत्तवाहिनी माध्यमातील उल्लेखनीय कामगिरी करणाऱ्या पत्रकारांनादेखील आश्वासक पुरस्कार दिला जातो.

ज्येष्ठ पत्रकार निखिल वागळे यांच्या हस्ते हा पुरस्कार दिला जाणार आहे. कार्यक्रमाच्या अध्यक्षस्थानी विधान परिषदेच्या उपसभापती नीलम गोऱ्हे असतील. तसेच सावित्रीबाई फुले पुणे विद्यापीठाच्या पत्रकारिता विभागात २०२१-२२ यावर्षी प्रथम आलेल्या कौस्तुभ राणे व चालू घडामोडी या विषयासाठी सुनील जाधव यांनादेखील पुरस्कार दिला जाणार असल्याचे देसाई यांनी सांगितले. या वेळी जयराम देसाई, प्रकाश भोंडे, डॉ. शैलेश गुजर आदी उपस्थित होते.