पुणे, ता. २८ : चांडोली (ता. खेड) येथील शासकीय निवासी शाळेत २०२३-२४ या शैक्षणिक वर्षाकरिता अनुसूचित जाती आणि नवबौद्ध मुलींच्या प्रवेशाची प्रक्रिया सुरू झाली आहे. इयत्ता सहावी ते दहावीच्या (सेमी इंग्रजी माध्यम) विद्यार्थिनींसाठी ही प्रवेश प्रक्रिया आहे.

अनुसूचित जातीच्या विद्यार्थिनींसाठी ८० टक्के, दिव्यांग प्रवर्गासाठी ३ टक्के, अनुसूचित जमातीसाठी १० टक्के, विमुक्त जाती व भटक्या जमातीसाठी ५ टक्के आणि विशेष मागास वर्गातील विद्यार्थ्यांसाठी २ टक्के आरक्षित जागा आहेत. प्रवेशासाठी गुणपत्रक, शाळा सोडल्याचा जातीचा, उत्पन्नाचा, रहिवासी दाखला, विद्यार्थी नोंद पत्रिका, विद्यार्थिनी आणि पालकांचे चार रंगीत छायाचित्रे, आधार कार्ड आणि बँक पासबुक या कागदपत्रांची आवश्यकता आहे. निवासी शाळेत प्रवेश घेण्यासाठीचा अर्ज मुलांची निवासी शाळा पेठ (आंबेगाव), दिवे (सासवड), तरंगवाडी (इंदापूर), मुलींची निवासी शाळा चांडोली (राजगुरुनगर) येथे उपलब्ध करून देण्यात आले आहेत, अशी माहिती मुख्याध्यापक एम. एम. वाघमारे यांनी दिली आहे.