गेली वीस वर्षे झाले मी न चुकता दिंडी करीत आहे. त्यातील पाच वर्षे विना चप्पल वारी केली. विशेष म्हणजे या काळात पायाला एकही फोड आला नव्हता. एकाही दिंडीत कधी कोणते दुखणे आले नाही. भक्तिभावाने श्रद्धा ठेवून आपण प्रवास केला तर कोणतेच विघ्न येत नसल्याचे मी वारीच्या निमित्ताने अनुभवले आहे.
- अशोक काळे

मी निफाड तालुक्यातील असून गेली १५ वर्ष वारी करीत आहे. मनात असेलच की वारी पूर्ण होतेच, हा माझा दरवर्षीचा अनुभव आहे. शिवाय दरवर्षीप्रमाणे यंदा देखील अतिशय चांगल्या पद्धतीने वारीचे नियोजन करण्यात आले आहे. मी शेतकरी असून गावकऱ्यांसोबत वारीत सहभागी झालो आहे. यंदा जोरदार पाऊस पडून असे विठुरायाकडे मागणी आहे.
- भाऊसाहेब शिंदे

लाखो भाविक भक्ती रसात न्हाऊन निघत असलेला हा दिंडी सोहळा भारतात इतर ठिकाणी कुठे होत असेल असे वाटत नाही. हे आपल्या संस्कृतीची खासियत आहे. गेल्या आठ वर्षांपासून सिल्लोडवरून येत वारीत सहभागी होत आहे. आयुष्याला अनोखे सुख देणारा हा अनुभव मी दरवर्षी वारीच्या निमित्ताने अनुभवतो.
- नामदेव कुंटे

भजनात दंग होऊन स्वतःला माऊलींच्या भरवशावर सोडून देवून होणारा हा प्रवास खूप चांगला आहे. आपली संतपरंपरा समजून घेत एक वेगळा अनुभव अनुभवण्यासाठी प्रत्येकाला वारीला जायला हवं, असे मला वाटते. लाखो वारकरी सहभागी होत असलेला हा वैष्णवांचा मेळावा आणि येत मिळत असलेला आनंद हा वर्षभर साथ देत असतो.
- काळुराम कांबळे