पुणे, ता. ४ : पत्नीच्या चारित्र्यावर संशय घेऊन तिला वारंवार मारहाण करत आत्महत्येस प्रवृत्त केल्याप्रकरणी पतीला अटक करण्यात आली आहे. त्रासाला कंटाळून पत्नीने मंगळवारी (ता. २) धनकवडी येथील राहत्या घरात आत्महत्या केली होती.

शिवानी दीपक दामगुडे (वय २४, रा. सुवर्णयुग शाळेच्या मागे, धनकवडी) असे आत्महत्या केलेल्या महिलेचे नाव आहे. या प्रकरणी आरोपी पती दीपक विठ्ठल दामगुडे (वय ३०) याला अटक करण्यात आली आहे. याबाबत शिवानी यांचे वडील काशिनाथ काळू राऊत (वय ५०, रा. कोपरखैरणी, नवी मुंबई) यांनी बुधवारी (ता. ३) सहकारनगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी यांच्या मुलीचे २०१९ मध्ये दीपक दामगुडे याच्यासोबत लग्न झाले होते. लग्नानंतर आरोपी पतीने शिवानीच्या चारित्र्यावर संशय घेऊन तिला बेदम मारहाण केली. तिला वारंवार शिवीगाळ करून सोडून देण्याची धमकी दिली. पतीकडून होत असलेल्या मानसिक आणि शारीरिक त्रासाला कंटाळून शिवानी यांनी घरात गळफास घेऊन आत्महत्या केली. राऊत यांच्या तक्रारीवरून पोलिसांनी आरोपी पतीविरुद्ध गुन्हा दाखल करून अटक केली आहे. पुढील तपास पोलिस करीत आहेत.

हडपसरमध्ये विवाहितेची आत्महत्या
पती व सासू-सासरे यांच्याकडून होत असलेल्या मानसिक व शारीरिक त्रासाला कंटाळून विवाहित महिलेने गळफास घेऊन आत्महत्या केली. शिवानी सिद्धार्थ थोरात (वय २६) असे आत्महत्या करणाऱ्या महिलेचे नाव आहे. शिवानी यांनी सोमवारी (ता. १) हडपसर भागातील काळेपडळ येथील शिवराय कॉलनीत आत्महत्या केली. त्यांना आत्महत्येस प्रवृत्त केल्याप्रकरणी पती सिद्धार्थ बिभीषण थोरात, सासू, सासरे बिभीषण थोरात (सर्व रा. शिवराय कॉलनी, काळेपडळ) यांच्यावर गुन्हा दाखल करण्यात आला आहे. याबाबत शिवानी यांचे वडील सुनील कामण्णा शिवपुजे (वय ५३, रा. पाटस ता. दौंड) यांनी वानवडी पोलिस ठाण्यात फिर्याद दिली आहे.