पुणे, ता. ३१ : वेळ सकाळी सहा ते साडेसहाची अन् मुहूर्त नरक चतुर्दशीचा. या भल्‍या सकाळी मोठ्या उत्‍साहात साडी, कुर्ता, पायजमा अशा पारंपरिक वेशभूषेत शेकडो पुणेकर शनिवारवाड्यावरील ऐतिहासिक वास्‍तूवर जमले आणि तेथून जंगली महाराज रस्‍त्‍यावरील झाशीची राणी चौक ते पुन्‍हा शनिवारवाडा असे अडीच किलोमीटर अंतर मोठ्या उत्‍साहाने धावले. निमित्त होते ‘सकाळ’तर्फे आयोजित ‘बजाज अलायंझ पुणे अर्धमॅरेथॉन’चे. यामध्‍ये गुरुवारी सकाळी आबालवृद्धांनी उत्स्फूर्तपणे सहभाग नोंदवत धावण्‍याचा आनंद लुटला.
दिवाळीच्‍या निमित्ताने ‘सकाळ’तर्फे गुरुवारी अर्धमॅरेथॉन स्‍पर्धा आयोजित केली होती. मुख्‍य मॅरेथॉनचा सराव म्‍हणून ही अर्धमॅरेथॉन आयोजित केली जाते. सकाळच्‍या उत्‍साही वातावरणात धावपटूंची पावले शनिवारवाड्याकडे वळू लागली. महिलांनी साडी तर पुरुषांनी कुर्ता व पायजम्‍याचा पेहराव करून शनिवार वाड्यावर गर्दी केली. यामध्‍ये पाच वर्षांच्‍या मुलांपासून ज्‍येष्‍ठ नागरिकांपर्यंत सर्वांचा सहभाग होता. या मॅरेथॉनचा मार्ग होता शनिवारवाडा, शिवाजी महाराज पूल, पुणे महापालिकेचे मागचे द्वार ते जंगली महाराज रस्‍त्‍यावरील झाशीची राणी पुतळा आणि पुन्‍हा परतण्‍यासाठी तोच मार्ग होता. झाशीची राणी पुतळ्याजवळून पुन्‍हा परत शनिवारवाडा या धावपटूंनी गाठला. धावपटूंचे स्‍वागत ढोल-ताशांच्या वादनाने झाले. यावेळी शनिवारवाड्यावर सर्वांनाच सेल्‍फी काढण्‍याचा मोह आवरला नाही.

‘सकाळ’च्‍या मॅरेथॉनमध्‍ये मी सुरुवातीपासून सहभागी होत आहे. संयोजन चांगल्‍या प्रकारे केले जाते. खास म्‍हणजे शनिवारवाडा ही तर पुण्‍याची ओळख आहे. त्‍यामुळे, येथून मॅरेथॉनमध्‍ये धावणे हे खूप आनंद देणारे आहे.
- ख्रिस्तोफर लुझाडो, धावपटू

मी तीन वर्षांपासून ‘सकाळ मॅरेथॉन’मध्‍ये सहभागी होत आहे. आज अर्धमॅरेथॉनमध्‍ये सहभागी व्‍हायला खूपच मजा आली. माझी नोकरी आयटी कंपनीत असल्याने मी १२ तास बसून असते. अशा वेळी ‘सकाळ’च्‍या या उपक्रमात धावण्यासाठी प्रेरणा मिळते. म्हणून मला चालायला वा पळायला आवडते.
- नीता वराडे, धावपटू

मी या मॅरेथॉनमध्‍ये धावतो आहे. हा उपक्रम खूपच स्तुत्य आहे. यामध्‍ये धावण्‍याबरोबरच एक वेगळा अनुभव मिळतो. कुटुंबासमवेत दिवाळी साजरी केल्याचा अनुभव येतो. मी नेहमी मॅरेथॉनमध्‍ये चप्‍पल, बूट न घालता धावतो.
- विजय गुमास्ते, धावपटू