पुणे, ता. २३ : अल्पवयीनांमध्ये झालेल्या वादातून एका टोळक्याने कोंढव्यातील मिठानगर भागातील रस्त्याच्या कडेला लावलेल्या तीन रिक्षा आणि दोन कारच्या काचा फोडून दहशत माजविली. या प्रकरणी चौघांविरुद्ध गुन्हा दाखल करण्यात आला असून, तीन अल्पवयीनांना ताब्यात घेण्यात आले आहे.
याबाबत अतिक अहमद शेख (वय ४८, रा. मिठानगर, कोंढवा) यांनी कोंढवा पोलिस ठाण्यात फिर्याद दिली आहे. पोलिसांनी दिलेल्या माहितीनुसार, अतिक शेख हे रिक्षाचालक आहेत. शुक्रवारी रात्री दीडच्या सुमारास तीन ते चार जण दुचाकीवरून मिठानगर परिसरात आले. टोळक्याने गल्ली क्रमांक दोनमधील रिक्षावर कोयता आपटून काच फोडली. त्या वेळी तेथून एक कारचालक निघाला होता. टोळक्याने कोयत्याने कारची काचही फोडली. चालक खाली वाकल्याने त्याला इजा झाली नाही. कारच्या दरवाजावर कोयते आपटून टोळक्याने दहशत माजविली, तसेच परिसरातील दोन मोटारी आणि रिक्षाच्या काचा फोडल्या. टोळक्यातील पसार आरोपीचा शोध सुरू आहे, अशी माहिती कोंढवा पोलिस ठाण्याचे वरिष्ठ पोलिस निरीक्षक विनय पाटणकर यांनी दिली.