पुणे, ता. २५ : ‘युनेस्को’ने छत्रपती शिवाजी महाराजांच्या १२ किल्ल्यांना जागतिक वारसास्थळ म्हणून नामांकित केले आहे. त्यानिमित्त शनिवार पेठ मेहुणपुरा सार्वजनिक गणेशोत्सव मंडळ ट्रस्टच्या वतीने यंदाच्या गणेशोत्सवात या किल्ल्यांची प्रतिकृती आणि त्यांचा इतिहास सांगणाऱ्या ध्वनी चित्रफितीचा देखावा साकारणार आहे, अशी माहिती मंडळाचे अध्यक्ष सचिन शिंदे यांनी पत्रकार परिषदेत दिली.
तसेच गणेशोत्सवात मंडळाकडून ३० ऑगस्ट ते तीन सप्टेंबर या कालावधीत प्रसिद्ध इतिहास अभ्यासकांच्या व्याख्यानमालेचे आयोजन दररोज रात्री आठ ते नऊ या वेळेत केले असल्याचे सांगण्यात आले. या वेळी मंडळाचे उपाध्यक्ष अनंत कावणकर, सचिव पराग ठाकूर, कार्याध्यक्ष कौस्तुभ गोखले, गिरीश सरदेशपांडे, महेश काटदरे यांच्यासह पदाधिकारी व कार्यकर्ते उपस्थित होते.