पुणे, ता. २७ : नामांकित शाळेतील क्रीडा शिक्षकाने दोन विद्यार्थिनींशी अश्लील वर्तन केल्याचा प्रकार उघडकीस आला. या प्रकरणी स्वारगेट पोलिसांनी क्रीडा शिक्षकाविरुद्ध गुन्हा दाखल करून त्याला अटक केली. त्याच्याविरुद्ध बालकांचे लैंगिक अत्याचारापासून संरक्षण कायद्यान्वये (पोक्सो) गुन्हा दाखल करण्यात आला आहे.
या प्रकरणात अटक करण्यात आलेला ४४ वर्षीय शिक्षक नामांकित शाळेत मल्लखांबाचे प्रशिक्षण देतो. याबाबत विद्यार्थिनीच्या पालकांनी स्वारगेट पोलिस ठाण्यात फिर्याद दिली आहे. पोलिसांनी दिलेल्या माहितीनुसार, सरावाच्या बहाण्याने त्याने दोन विद्यार्थिनींशी अश्लील वर्तन केले. या घटनेची माहिती विद्यार्थिनींनी कुटुंबीयांना दिली. पालकांनी शाळा प्रशासन आणि पोलिसांकडे तक्रार केली. या प्रकरणात शिक्षकाला अटक केली असल्याची माहिती स्वारगेट ठाण्याचे वरिष्ठ पोलिस निरीक्षक यशवंत निकम यांनी दिली.