पुणे, ता. ८ : अनेक राष्ट्रीय वाहिन्या आणि समाजमाध्‍यमांवर सातत्याने चंद्रग्रहणाविषयी अंधश्रद्धा पसरवली जात होती. गर्भवती महिलांनी ग्रहणकाळात एकाच जागेवर बसावे, पाणी पिऊ नये, तसेच मलमूत्र विसर्जन करू नये अशा स्वरूपाचे अवैज्ञानिक सल्ले दिले जात होते. अंधश्रद्धा पसरवणाऱ्या व्यक्ती आणि संस्था यांच्यावर शासनाने कठोर कारवाई करावी, अशी मागणी महाराष्ट्र अंधश्रद्धा निर्मूलन समितीने प्रसिद्धी पत्रकाद्वारे केली आहे.
चंद्रग्रहण ही एक साधी खगोलीय घटना आहे. त्यामध्ये कोणतीही नवीन ऊर्जा किंवा किरणे तयार होत नसतात. दर सहा महिन्यांनंतर पृथ्वी, चंद्र आणि सूर्य यांच्या समान पातळीमध्ये आल्यानंतर होणारा सावल्यांचा हा खेळ किंवा परिणाम असतो. भाजी चिरणे, कात्री वापरणे हे सर्व करीत राहण्यास कोणतीही अडचण नसते किंवा त्यांचा कोणताही दुष्परिणाम होत नसतो. अशाप्रकारचा सल्ला पाळल्याने तीन वर्षांच्या पूर्वी साताऱ्यात एका गर्भवती महिलेचा मृत्यू झाला होता. राज्यातील अनेक स्त्रीरोग तज्ज्ञांच्या संघटनांनी गर्भवती महिलांवर ग्रहणाचा कोणताही परिणाम होत नाही, असे स्‍पष्‍ट केले आहे.