पुणे, ता. ११ : माहेरून पैसे न आणल्याने सासरी होत असलेल्या छळाला कंटाळून एका विवाहितेने आत्महत्या केल्याची घटना समोर आली आहे. ही घटना दत्तवाडी परिसरात सोमवारी (ता. ८) सकाळी दहा वाजता घडली. साजिदा असीम शेख (वय २३, रा. जनता वसाहत, पर्वती) असे आत्महत्या केलेल्या विवाहितेचे नाव आहे. याबाबत विवाहितेच्या आईने (वय ४२, रा. पर्वती) फिर्याद दिली आहे. त्यानुसार, विवाहितेचा पती आणि सासू-सासऱ्याविरुद्ध पर्वती पोलिस ठाण्यात गुन्हा दाखल करण्यात आला आहे. साजिदाला सातत्याने माहेरून पैसे आणण्याचा दबाव टाकला जात होता. त्यासाठी तिला शारीरिक व मानसिक त्रास देण्यात येत होता. या छळाला कंटाळून तिने घरी गळफास घेऊन जीवन संपविले, असे फिर्यादीत म्हटले आहे. त्यावरून पोलिसांनी गुन्हा दाखल केला आहे.