पुणे, ता. १८ ः ‘पीएमपी’च्या प्रवाशांना आता लवकरच आपल्या मोबाईल ॲपद्वारे मेट्रोचेदेखील तिकीट काढता येणार आहे. कारण, नुकतेच ‘पीएमपी’ प्रशासन व मेट्रो प्रशासन यांच्यात बैठक झाली असून दोघांची तिकीट प्रणाली एकमेकांच्या सॉफ्टवेअरशी जोडण्यासाठी आवश्यक असलेल्या एपीआय (ॲप्लिकेशन प्रोग्रॅमिंग इंटरफेस) हस्तांतर करण्याबाबत सहमती झाली आहे. शिवाय ‘पीएमपी’ व मेट्रो प्रशासनाचे तांत्रिक विभागाचे चमूदेखील या आठवड्यात बैठक घेणार असून, यात ही नवी प्रणाली कधीपासून कार्यान्वित करायची, याबाबत निर्णय होणार आहे.
गेल्या काही महिन्यांपासून ‘पीएमपी’ व मेट्रो प्रशासन आपली तिकीट प्रणाली एकमेकांना जोडण्यासाठी सातत्याने प्रयत्न करीत होती, मात्र काही केल्या यात समाधानकारक प्रगती होत नव्हती. ‘पीएमपी’च्या अध्यक्षांनी मात्र पुन्हा एकदा हा विषय लावून धरला आहे. परिणामी, लवकरच एकमेकांना ‘एपीआय’ दिले जाणार आहे. त्यामुळे प्रवाशांची मोठी सोय होणार आहे. प्रवाशांच्या वेळेतदेखील बचत होणार आहे.

‘पीएमपी’चे १० लाख, तर मेट्रोचे एक लाख प्रवासी वापरकर्ते
‘पीएमपी’च्या ‘आपली पीएमपीएमएल’ हे मोबाइल ॲप जवळपास १० लाख प्रवाशांनी डाउनलोड करून सातत्याने प्रवास करीत आहेत; तर मेट्रोच्या सुमारे एक लाख प्रवाशांनी मेट्रोचे ॲप डाउनलोड केले आहे. या सर्व प्रवाशांची माहिती, तिकीट प्रणालीला जोडलेली आवश्यक माहिती आता सॉफ्टवेअरच्या माध्यमातून एकमेकांना हस्तांतर केली जात आहे. यामुळे ‘पीएमपी’च्या प्रवाशाला मेट्रोचे व मेट्रोच्या प्रवाशाला ‘पीएमपी’चे तिकीट काढता शक्य होणार आहे.

तांत्रिक विभाग एकत्रित काम करणार
‘पीएमपी’ व मेट्रो प्रशासनाचे तांत्रिक विभागाच्या अधिकाऱ्यांची एक महत्त्वपूर्ण बैठक होणार आहे. या बैठकीत ही सेवा कधी सुरू करायची आणि त्यासाठी आवश्यक तांत्रिक बाबींवर चर्चा करून अंतिम निर्णय घेतला जाईल. ही योजना यशस्वी झाल्यास, पुणे शहरातील सार्वजनिक वाहतूक व्यवस्था अधिक सुलभ आणि एकात्मिक होईल. याचा थेट फायदा प्रवाशांना होणार आहे.

एकात्मिक तिकीट प्रणाली संदर्भात नुकतीच मेट्रोच्या अधिकाऱ्यांसोबत चर्चा झाली आहे. यात एकमेकांना ‘एपीआय’ देण्यासंदर्भात निर्णय झाला आहे. लवकरच ही प्रणाली सुरू होईल.
- पंकज देवरे, अध्यक्ष व व्यवस्थापकीय संचालक, पीएमपीएमएल, पुणे