पुणे, ता. १९ : महिलांकडील दागिने हिसकावणाऱ्या चोरट्याला दरोडा आणि वाहनचोरी विरोधी पथकाने अटक केली. त्याच्याकडून मोटार, मोबाइल असा १५ हजार रुपयांचा ऐवज जप्त केला. सुनील रावण शिंदे (वय २९, रा. श्रीरामपूर, जि. अहिल्यानगर) असे अटक करण्यात आलेल्याचे नाव आहे.
शिंदे याने सहकारनगर भागात एका महिलेचे दागिने हिसकाविले होते. याप्रकरणी सहकारनगर पोलिस ठाण्यात गुन्हा दाखल झाला होता. गुन्हे शाखेच्या दरोडा आणि वाहनचोरी विरोधी पथकाकडून समांतर तपास करण्यात येत होता. तपासात शिंदे याने महिलेकडील दागिने हिसकाविल्याची माहिती धनंजय ताजणे, रवींद्र लोखंडे, साईकुमार कारके यांना मिळाली. शिंदे शनिवार पेठेतील नदीपात्रातील रस्त्यावर थांबल्याची माहिती मिळाल्यानंतर पोलिसांनी सापळा लावून त्याला पकडले. त्याच्याकडून मोटार आणि मोबाईल जप्त केला. चौकशीत शिंदे आणि त्याच्याबरोबर असलेल्या तीन साथीदारांनी महिलेकडील दागिने हिसकाविण्याचा गुन्हा केल्याची माहिती मिळाली आहे.