पुणे, ता. २० : खुनाचा प्रयत्न केल्याप्रकरणी आठ महिन्यांपासून फरार असलेला आरोपी करण भारत गजरमल (वय १९, रा. दभाडी, आंबेगाव बुद्रुक) यास भारती विद्यापीठ पोलिसांच्या तपास पथकाने अखेर अटक केली.
खुनाचा प्रयत्न आणि आर्म्स अ‍ॅक्टअंतर्गत भारती विद्यापीठ पोलिस ठाण्यात दाखल गुन्ह्यात तो आठ महिन्यांपासून फरार होता. तपास पथकातील पोलिस उपनिरीक्षक नीलेश मोकाशी, पोलिस अंमलदार मितेश चोरमोले, अभिनय चौधरी, सागर बोरगे आदी कर्मचारी त्याचा शोध घेत होते. दरम्यान, करण गजरमल हा चौकाजवळ थांबल्याची माहिती मिळताच १९ ऑगस्ट रोजी पथकाने त्याला शोधून काढत अटक केली. परिमंडळ दोनचे पोलिस उपआयुक्त मिलिंद मोहिते, सहाय्यक आयुक्त राहुल आवारे यांच्या मार्गदर्शनाखाली वरिष्ठ निरीक्षक राहुल खिलारे, पोलिस निरीक्षक (गुन्हे) जितेंद्र कदम यांच्या पथकाने ही कारवाई केली.