पुणे, ता. २० : शहरातील मुंबई-पुणे महामार्गावरील वाकडेवाडी परिसरात मंगळवारी (ता. १९) पहाटे ब्रह्मा मोटर्स बुलेट विक्री शोरूममध्ये दोन दरोडेखोरांनी शस्त्राचा धाक दाखवत सात लाख ११ हजार रुपयांची रोकड लुटून नेली. सुरक्षारक्षकाला जिवे मारण्याची धमकी देत कपाटातील रोकड हिसकावून चोरटे अंधारात पसार झाले.
या प्रकरणी सुरक्षारक्षक इंद्रसेन जाचक (वय ४५, रा. बावधन) यांनी खडकी पोलिस ठाण्यात फिर्याद दिली आहे. त्यानुसार दोघा अज्ञात चोरट्यांविरुद्ध गुन्हा दाखल करण्यात आला आहे. पोलिस सूत्रांनी दिलेल्या माहितीनुसार, पहाटेच्या सुमारास दोन चोरटे शोरूममध्ये शिरले. त्यांनी सुरक्षारक्षकाला शस्त्राचा धाक दाखवून जिवे मारण्याची धमकी दिली. त्यानंतर शोरूममधील काउंटरमधून सात लाख ११ हजार रुपयांची रोकड घेऊन पळ काढला. या घटनेची माहिती मिळताच पोलिस घटनास्थळी दाखल झाले. खडकी पोलिसांनी शोरूममधील सीसीटीव्ही कॅमेऱ्याचे चित्रीकरण ताब्यात घेऊन तपास सुरू केला आहे. पोलिस उपनिरीक्षक दिग्विजय चौगुले पुढील तपास करत आहेत.
-------