पुणे, ता. १२ : दिव्यांग व्यक्तींनी तयार केलेल्या वस्तूंच्या विक्रीसाठी ‘उमंग’ या प्रदर्शनाचे आयोजन शनिवार (ता. १३) व रविवार (ता. १४) डेक्कन जिमखाना येथील गो. ल. आपटे सभागृहात सकाळी ११ ते रात्री नऊ या वेळेत करण्यात आले आहे.
सिल्करूट एक्झिबिटर्सतर्फे भरविण्यात येणाऱ्या या प्रदर्शनाचे हे सलग तिसरे वर्ष असून यामध्ये केवळ दिव्यांग व्यक्ती आणि त्यांच्या संस्थांचेच ३५ स्टॉल्स आहेत. त्यासोबतच दिवाळीनिमित्त लागणाऱ्या मेणबत्त्या, पणत्या, आकाशकंदील, सजावटीचे साहित्य, भेटपाकिटे, रांगोळ्या, तसेच चॉकलेट्स, फराळ, पिठे, साबण आणि सौंदर्यप्रसाधने यांसारख्या विविध हस्तनिर्मित वस्तू प्रदर्शनासह विक्रीसाठी उपलब्ध राहणार आहेत. या उपक्रमाला रोटरी क्लब ऑफ पुणे वेस्टेंड, रोटरॅक्ट क्लब ऑफ पुणे रॉयल आणि सेन्सेस इलेक्ट्रॉनिक्स यांचे साहाय्य मिळाले आहे. तर गो. ल. आपटे सभागृहाचे अभिजित आपटे यांनी स्थळ प्रायोजकत्व दिले आहे. उद्‍घाटनप्रसंगी रोटरी डिस्ट्रिक्ट ३१३१चे माजी प्रांतपाल मोहन पालेशा उपस्थित राहणार आहेत. दिव्यांगांना प्रोत्साहन आणि आर्थिक सक्षमीकरण मिळावे, हा या उपक्रमामागचा हेतू असून नागरिकांनी प्रतिसाद देऊन दिव्यांगांचे मनोबल उंचावेल, असे आवाहन आयोजकांनी केले आहे.