पुणे, ता. १९ : पुण्यात अनेक ठिकाणी बुधवारी सलग तिसऱ्या दिवशी १० अंश सेल्सिअसपेक्षा कमी किमान तापमानाची नोंद झाली. प्रामुख्याने पाषाण, हवेली येथे सलग तीन दिवस नऊ अंश सेल्सिअसपेक्षा जास्त आणि १० अंश सेल्सिअसपेक्षा कमी किमान तापमान नोंदविले गेले. गेल्या तीन दिवसांपासून पुणेकर थंडीने गारठले आहेत.
कोकण-गोव्यासह मध्य महाराष्ट्र मराठवाडा आणि विदर्भात पुढील तीन दिवस हवामान कोरडे राहील, तर कोकण-गोवा आणि मध्य महाराष्ट्रात शनिवारी (ता. २२) आणि रविवारी (ता. २३) तुरळक ठिकाणी पाऊस पडण्याची शक्यता भारतीय हवामानशास्त्र विभागाने वर्तविली आहे. शिवाजीनगरमध्ये बुधवारी ९.५ अंश सेल्सिअस तापमानाची नोंद झाली आहे.
पुणे आणि परिसरात गुरुवारी (ता. २०) आणि शुक्रवारी (ता. २१) किमान तापमान १० अंश सेल्सिअस किंवा त्यापेक्षा जास्त राहण्याची शक्यता आहे, तर शनिवार (ता. २२) ते मंगळवार (ता. २५) दरम्यान आकाश मुख्यतः निरभ्र आणि अंशतः ढगाळ राहील, असा अंदाज हवामानशास्त्र विभागाने दिला आहे.

शहरात बुधवारी नोंदविलेले किमान तापमान (अंश सेल्सिअसमध्ये)
दौंड (९.९), तळेगाव (९.६), बारामती (९.५), शिवाजीनगर (९.५), आंबेगाव (९.४), पाषाण (९.३), माळीण (९), हवेली (७.७)

शहरात गेल्या तीन दिवसांत नोंदविलेले किमान तापमान (अंश सेल्सिअसमध्ये)
परिसर : १९ नोव्हेंबर : १८ नोव्हेंबर : १७ नोव्हेंबर
शिवाजीनगर : ९.५ : ९.४ : १०.२
पाषाण : ९.३ : ९.० : ९.८
हवेली : ७.७ : ६.९ : ८.७
आंबेगाव : ९.४ : १०.७ : ११.२
बारामती : ९.५ : ८.९ : १०.६
तळेगाव : ९.६ : ९.९ : १०.३