पुणे, ता. २१ : हडपसरमधील सय्यदनगर, काळेपडळ भागात दहशत पसरविणारा कुख्यात गुंड रिझवान ऊर्फ टिपू पठाणसह त्याच्या टोळीवर महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्यात आली. याबाबतचा आदेश पोलिस आयुक्त अमितेश कुमार यांनी दिला आहे.
टिपू पठाणच्या नावावर खून, खुनाचा प्रयत्न, दहशत पसरविणे, खंडणी अशा स्वरूपाचे २५ गंभीर गुन्हे दाखल आहेत. या टोळीने सय्यदनगरमधील एका जागेवर बेकायदा ताबा घेऊन पत्र्याचे शेड उभारले होते. तक्रारदार महिलेने ताबा सोडण्यास सांगताच पठाणने २५ लाखांची खंडणी मागितली. तसेच, खंडणी न दिल्यास जीवे मारण्याची धमकी दिली. या प्रकरणी काळेपडळ ठाण्याचे वरिष्ठ पोलिस निरीक्षक मानसिंग पाटील यांनी पोलिस उपायुक्त डॉ. राजकुमार शिंदे यांच्याकडे ‘मकोका’ प्रस्ताव पाठविला. अतिरिक्त पोलिस आयुक्त मनोज पाटील यांनी प्रस्तावाची पडताळणी केल्यानंतर पोलिस आयुक्तांनी त्याला मंजुरी दिली.