पुणे, ता. १४ : बाणेर येथील पॅनकार्ड क्लब रस्ता परिसरातील एका स्पा सेंटरच्या नावाखाली सुरू असलेल्या वेश्याव्यवसायावर बाणेर पोलिसांनी कारवाई केली. यावेळी तेथून सात महिलांची सुटका करण्यात आली आहे. फॉर्चून स्पा सेंटरमध्ये हा प्रकार सुरू होता.
स्पा मॅनेजर सुशील त्रिलोक ठाकूर (वय २६, रा. बाणेर, मुळ. हिमाचल प्रदेश), दीपक बिजेंद्र सिंह (वय ३१, रा.दिल्ली), स्पा मालक ऋषभ राजेंद्र पाटील (वय ३०, रा. जळगाव), जागा मालक जयेश सुनील अतमानी (वय २९, रा. पिंपळे सौदागर) या चौघांवर अनैतिक मानवी वाहतूक व्यापार प्रतिबंधक कायद्यानुसार गुन्हा दाखल झाला आहे. याप्रकरणी महिला पोलिस उपनिरीक्षक शैला पाथरे यांनी फिर्यादी दिली.
पोलिसांनी दिलेल्या माहितीनुसार, पॅनकार्ड क्लब रस्ता येथील ओंकार पॅराडाईज या इमारतीत फॉर्च्युन स्पा सेंटरमध्ये वेश्याव्यवसाय सुरू असल्याची माहिती बाणेर पोलिसांना मिळाली होती. त्यानुसार बनावट ग्राहक पाठवून खात्री केली असता सर्व प्रकार समोर आला. त्यानुसार बाणेर पोलिसांनी शुक्रवारी (ता. १२) सायंकाळी पावणे सात वाजताच्या सुमारास छापा टाकून महिलांची सुटका केली.

घरातच सुरू होता कुंटणखाना
राहत्या घरामध्ये पश्चिम बंगाल येथील दोन महिलांकडून वेश्याव्यवसाय करून घेणाऱ्या महिलेवर आंबेगाव पोलिसांनी अनैतिक मानवी वाहतूक प्रतिबंध कायद्यानुसार गुन्हा दाखल केला. मनीषा रघुनाथ साळुंखे (वय ४०, रा. संतोषनगर, कात्रज) असे गुन्हा दाखल झालेल्या महिलेचे नाव आहे. याप्रकरणी महिला सहायक फौजदार छाया जाधव यांनी फिर्याद दिली. शुक्रवारी (ता. १२) सायंकाळी पाच वाजण्याच्या सुमारास ही कारवाई केली.