पुणे, ता. १५ : गेल्या तीन दिवसांपासून सुरू असलेल्या पावसाचा जोर सोमवारीही कायम होता. पुढील दोन ते तीन दिवसांत पावसाचा जोर आणखी वाढण्याची तर मंगळवारी (ता. १६) घाट विभागात मुसळधार पावसाची शक्यता भारतीय हवामानशास्त्र विभागाने वर्तविली आहे. त्यामुळे पुण्याच्या घाट विभागात मंगळवारी ‘ऑरेंज’ अलर्ट देण्यात आला आहे.
शहर आणि परिसरात सोमवारी कमाल तापमानात मोठी घट नोंदविण्यात आली. कमाल तापमान २५ अंश सेल्सिअस तर किमान तापमान २१.९ अंश सेल्सिअस इतके नोंदविण्यात आले. पुणे आणि परिसरात मंगळवारी (ता. १६) कमाल तापमानात किंचित वाढ होणार असून कमाल तापमान २६ अंश सेल्सिअस तर किमान तापमान २१ अंश सेल्सिअस इतके नोंदविण्यात येणार आहे. आकाश सामान्यतः ढगाळ राहणार असून हलक्या ते मध्यम स्वरूपाचा पाऊस पडण्याची शक्यता आहे. बुधवारी (ता. १७) कमाल तापमानात किंचित वाढ होण्याची शक्यता आहे. कमाल तापमान २७ अंश सेल्सिअसपर्यंत नोंदविण्यात येणार असून आकाश सामान्यतः ढगाळ राहणार असून हलक्या ते मध्यम स्वरूपाचा पाऊस पडण्याची शक्यता हवामानशास्त्र विभागाने वर्तविली आहे.